Демократ сенатор Крис Мёрфи Дональд Трамп маъмурияти Эрон билан бўлаётган уруш устидан «назоратни йўқотганини» ва Теҳроннинг жавоб бериш салоҳиятини жиддий баҳоламаганини билдирди.
Мёрфининг айтишича, асосий муаммолардан бири – Эрон томонидан Ҳурмуз бўғозининг ёпилиши бўлди. Унинг таъкидлашича, Трамп бу ҳолатни амалга ошиши мумкин эмас деб ҳисоблаган.
Сенатор огоҳлантиришича, агар бўғоз ёпиқ ҳолда қолса, бу бутун дунё учун жиддий иқтисодий ва сиёсий оқибатларга олиб келиши мумкин.
Унинг сўзларига кўра, АҚШда ҳозирча кемалар ҳаракатини тиклаш бўйича аниқ режа йўқ. Чунки Эронда кўп сонли дронлар, тезюрар қайиқлар ва денгиз миналари мавжуд бўлиб, уларни бартараф этиш жуда қийин.
Мёрфи шунингдек, уруш «дронлар уруши»га айланиб бораётганини, Эрон эса минтақадаги нефть инфратузилмасига зарбалар беришни давом эттира олишини айтди.
Сенатор можаро янада кенгайиб, Ливан, Сурия ва Яманни ҳам қамраб олиши мумкинлигидан огоҳлантирди.
У Трамп маъмуриятини ҳарбий операцияни тўхтатишга чақириб, қуруқликдаги ҳарбий босқин «Охирзамон уруши»га ва минглаб америкалик аскарлар ҳалок бўлишига олиб келиши мумкинлигини таъкидлади.
Leave a Reply