Eltuzar

Category: Ўзбекистон

  • АНДИЖОНДА ММТБ МУДИРИ НАВРЎЗ КЎЧАТИ БАҲОНАСИДА ЙИРИК КОРРУПЦИЯГА ҚЎЛ УРДИ

    АНДИЖОНДА ММТБ МУДИРИ НАВРЎЗ КЎЧАТИ БАҲОНАСИДА ЙИРИК КОРРУПЦИЯГА ҚЎЛ УРДИ

    Андижон шаҳрида Мактабгача ва мактаб таълими бошқармаси мудири Азиз Усмонов мактаб директорлари ва боғча мудирларидан 2 миллион 300 минг сўмдан ўлпон йиғиб олаётгани ҳақида жиддий айбловлар келиб тушмоқда.

    Элтузарга йўлланган шикоятга кўра, шаҳардаги 13 мактаб директори Наргиза Абдураҳмонова Наврўз сайлига “Андижон сити”ни безаш учун 120 та ташкилот раҳбаридан 276 миллион сўм маблағ йиғиб олган.

    Дарров бир Треккер ва бир Оникс мошинди пулини ҳисоблашга ўтиб кетманг, пийпл. Чунки бу йиғимдан сўнг яна 500 минг сўмдан, жами 60 миллион сўм йиғилгани маълум бўлмоқда.

    “Йиғилган маблағнинг фақат бир қисмига кўчат олиб Андижон ситида экилди. Қолган маблағ қаерга кетди? Буни текширадиган прокуратура, ДХХ масъуллари борми? Ҳадеб пул йиғиб беришдан чарчадик,” – дейди мурожаатчилар.

    Текширадиган орган расман ариза билан мурожаат қилинсагина бош қашлаб ишга киришиши мумкин. Лекин аниқ эмас. Бу ҳам бир эҳтимол-да, ҳурматли устозлар. Чиқмаган жондан умид…

  • ХОРАЗМДА ҲОКИМЛИК АЁЛЛАР ФАОЛЛАРИ ЧЎНТАГИГА КЎЗ ТИКДИ

    ХОРАЗМДА ҲОКИМЛИК АЁЛЛАР ФАОЛЛАРИ ЧЎНТАГИГА КЎЗ ТИКДИ

    Шовот туманида 52 та маҳалла бор, аммо аёллар фаоллари сони 33 та. Айрим аёллар фаоллари бир пайтнинг ўзида 2-3 та маҳаллага бириктирилган.

    Қизиғи шундаки, ҳар йили Наврўз байрами арафасида истироҳат боғида сайил ўтказилади ва ҳокимлик томонидан ҳар бир маҳалла учун биттадан байрам столи безатиш топширилади. Бир столни безатиш харажати тахминан 300–400 минг сўмни ташкил қилади.

    Афсуски, бу харажатлар амалда аёллар фаолларининг ўз чўнтагидан тўланади. Ҳолбуки, уларнинг ўзи ҳам бир неча маҳалла масъулиятини кўтариб юрибди.

    Жаноб ҳоким, болаларимиз ва оиламиз ризқига тегманг, дея ўтинади тадбирбозлик ва кўзбўямачи байрамлардвн чарчагян аёллар фаоллари.

  • ФАРҒОНАДАГИ ТЕРГОВЛАР ОРТИДА НИМА БОР?

    ФАРҒОНАДАГИ ТЕРГОВЛАР ОРТИДА НИМА БОР?

    Фарғона вилояти Учкўприк тумани жамоатчилик назорати фаоли Йўлчибой Исмоилов Ўзбекистон Республикаси Бош прокурори Ниғматилла Йўлдошев номига очиқ мурожаат йўллаб, вилоятдаги айрим прокурорлар ва тергов органлари фаолияти юзасидан кескин иддаоларни илгари сурди.

    Мурожаатда Учкўприк тумани прокурори Ў. Йўлчиев, Данғара тумани прокурори М. Абдураҳимов ҳамда Фарғона вилояти прокурори Б. Исмоилов номи тилга олинган.

    Муаллиф фикрича, айрим жиноят ишлари қонуний асосдан кўра, манфаатлар тўқнашуви, маҳаллий таъсир доиралари ва шахсий адоват эҳтимоли билан боғлиқ ҳолда юритилаётгандек таассурот қолдирмоқда.

    Йўлчибой Исмоилов мурожаатида икки қўшни туман прокурорлари ҳаракатлари бир нуқтага қаратилгани, тергов органлари эса мустақил эмас, балки муайян топшириқлар асосида иш олиб бораётгандек кўринаётганини таъкидлайди.

    Унинг ёзишича, бу ҳолатлар давлат идораларининг ваколатлари шахсий мақсадлар йўлида ишлатилаётгани ҳақида жиддий саволларни кун тартибига чиқармоқда.

    Мурожаат муаллифи, шунингдек, Учкўприкдаги ер билан боғлиқ ҳолатларни ҳам тилга олиб, 0,06 гектар ернинг 0,26 гектарга айланиб қолгани билан боғлиқ жараёнлар, шунингдек, эҳтимолий манфаатдорлик алоқалари очиқ ва холис текширилмаганини иддао қилган. Унга кўра, мазкур ҳолатлар юзасидан жамоатчиликка аниқ ва расмий изоҳ берилмаган.

    Мурожаатда яна бир муҳим нуқтага эътибор қаратилган: муаллифнинг таъкидлашича, Фарғона вилоятидан ташқарида кўрилган айрим суд ишларида маҳаллий даражада шаклланган айбловлар ўз тасдиғини топмаган.

    У буни тергов ва прокуратура фаолиятини чуқур қайта кўриб чиқиш учун асос бўладиган жиддий сигнал сифатида баҳолаган.

    Йўлчибой Исмоилов Бош прокуратурадан мазкур ҳолатларни шахсий назоратга олиш, холис хизмат текшируви тайинлаш, мурожаатда номи тилга олинган мансабдорлар фаолиятига ҳуқуқий баҳо бериш ва жамоатчиликка расмий ахборот тақдим этишни сўраган.

    Таҳририят расмий муносабат тақдим этилган тақдирда, уни ҳам эълон қилишга тайёр.

  • ПАХТАКОР ММТБНИНГ СУДЛАНГАН РАҲБАРИ НЕГА ҲАЛИ ҲАМ ЎЗ КУРСИСИДА?

    ПАХТАКОР ММТБНИНГ СУДЛАНГАН РАҲБАРИ НЕГА ҲАЛИ ҲАМ ЎЗ КУРСИСИДА?

    Жиззах вилояти Пахтакор тумани мактабгача ва мактаб таълими бўлими атрофидаги ҳолат жамоатчиликда жиддий саволларни пайдо қилган. Элтузарга тақдим этилган суд ҳужжати ва 17 март куни вилоят прокурорининг фаоллар билан учрашуви стенограммасида келтирилган маълумотлар бир нарсани кўрсатади: гап катта миқдордаги бюджет маблағлари билан боғлиқ жиноятлар ҳақида кетяпти, аммо айрим мансабдорлар ҳануз тизимда ишлаб юрибди.

    Тақдим этилган материалларга кўра, Пахтакор тумани ММТБ раҳбари Мадина Турғунова ва бош ҳисобчи Абдумалик Эрматовга нисбатан Жиноят кодексининг 167-моддаси 3-қисми “а” банди, яъни ўзлаштириш ёки растрата йўли билан талон-торож қилиш, шунингдек 209-моддаси 2-қисми “а” банди, яъни мансаб сохтакорлиги билан боғлиқ айбловлар қайд этилган.

    Суд ҳужжатидан англашилишича, улар якка тартибдаги тадбиркор билан тил бириктириб, 2025 йил 13 январда тузилган шартнома доирасида эҳтиёт қисмларини қимматлаштирилган нархларда харид қилиш орқали давлат маблағларига зарар етказган. Ҳужжатда 4909 дона эҳтиёт қисмидан 404 миллион 987,5 минг сўм миқдорида ортиқча харажат қилингани кўрсатилган. Шунингдек, 2024-2025 йилларда харид қилинган озиқ-овқат маҳсулотларининг 894 миллион сўмлик қисми ортиқча олингани ва манзилли тарқатилмагани ҳақида ҳам қайдлар бор. Умумий моддий зарар миқдори эса 1 миллиард 431 миллион 495,3 минг сўм деб баҳоланган.

    Янада диққатга сазовор жиҳат шундаки, тақдим этилган ҳужжатга кўра, Зафаробод туман судининг 2026 йил 4 мартдаги ҳукми билан Мадина Турғунова ва Абдумалик Эрматовга нисбатан жазо тайинланган. Ҳужжатда улар 2 йилга таълим тизими ҳамда давлат улуши мавжуд ташкилотларда мансабдорлик ва моддий жавобгарлик вазифаларида ишлаш ҳуқуқидан маҳрум қилиниб, иш ҳақининг 20 фоизи давлат ҳисобига ушлаб қолинган ҳолда 3 йил ахлоқ тузатиш ишларига ҳукм этилгани кўрсатилади.

    Суд ҳукми чиққан бўлса, нега бу шахслардан бири – Мадина Турғунова ҳали ҳам лавозимида қолмоқда? Нега таълим соҳасида миллиардлаб сўмлик зарар ҳақида гап кетар экан, Мадина Турғуновага нисбатан зудлик билан қатъий чора кўрилмаган?

    17 март куни вилоят прокурорининг фаоллар билан учрашуви стенограммасида ҳам бу масала кескин оҳангда тилга олингани айтилади. Унда таълим тизимида бюджет маблағларидан мақсадсиз ва қимматлаштирилган харидлар орқали фойдаланиш ҳолатларига алоҳида эътибор қаратилган. Вилоят прокурори мажлисда қатнашаётган Турғуновадан нима учун ҳалигача ўз лавозимида қолаётганини сўраган ва мажлис залидан чиқиб кетишни талаб қилган.

    Элтузга етказилган қўшимча маълумотларда Турғунованинг ишдан олинмай келаётгани Жиззах вилояти ММТБ раҳбариятидаги айрим мансабдорлар, хусусан ҳозирда вилоят бошқармаси бошлиғи вазифасини вақтинча бажараётган Шоҳида Даманова билан муносабатлар фонида изоҳланмоқда. Бироқ бу даъволар расмий идоралар томонидан очиқ ва аниқ тарзда рад этилмаса ёки тасдиқланмаса, жамоатчиликда “судланган кадрни ким ҳимоя қиляпти?” деган савол янада кучаяди.

    Жиззах вилояти мактабгача ва мактаб таълими бошқармаси, вилоят прокуратураси ҳамда мутасадди ташкилотлар жамоатчилик олдида очиқ жавоб бериши керак. Мадина Турғунова нега ишдан олинмаган? Суд ҳукми ижроси нега тўлиқ таъминланмади?

  • “РОССИЯ-УКРАИНА” УРУШИДАН ҚОЧГАН ЎЗБЕК

    “РОССИЯ-УКРАИНА” УРУШИДАН ҚОЧГАН ЎЗБЕК

    Косонлик А.Н Россия Федерациясига ишлаш мақсадида бориб, ўзга юртда яшаш қоидаларини бузгани сабабли полиция ходимлари томонидан ушланди.

    Жавобгарликка тортилмаслик мақсадида эса Россия Федерацияси Мудофаа вазирлиги томонидан тақдим этилган 1 йиллик “Россия-Украина” урушида иштирок этиш бўйича шартномани имзолаб, Россия Федерациясининг ҳарбий хизматига кирган.

    Кейин эса Россия Федерацияси Ханты-Мансийск шаҳрида жойлашган ҳарбий полигонидан қочиб, Москвадаги Ўзбекистон Республикаси элчихонасига мурожаат қилган.

    Шу билан ватанга эсон-омон қайтиб келдию, аммо “қилмиш-қидирмиш”, деганлар. Ҳеч бир жиноят жазосиз қолмайди. А.Н

    Ўзбекистон Республикаси ЖК 1541-моддаси 1-қисми билан айбли деб топилиб, унга базавий ҳисоблаш миқдорининг 20 бараварида 8 миллион 240 минг сўм жарима тайинланди.

  • ХИТОЙЛИК “САВДОГАР”75 МИЛЛИОН СЎМ ЖАРИМАГА ТОРТИЛДИ

    ХИТОЙЛИК “САВДОГАР”75 МИЛЛИОН СЎМ ЖАРИМАГА ТОРТИЛДИ

    Хитой Халқ Республикаси фуқароси чет элда ишлаб чиқарилган акциз маркасиз, Ўзбекистон Республикаси ҳудудида сотиш тақиқланган, таркибида никотин бўлган электрон сигареталарни келгусида ўтказиш мақсадида сақлаб келган.

    Хитойлик “савдогар” жами 36 дона электрон сигарета (20 дона Chirs Bown ва 16 дона Panthr Bar)ни  3.840.000 сўм эвазига “шартли харидор”га сотган вақтида ушланди.

    Ц.Цнинг яшаш жойи тинтув қилинганда  Ўзбекистон Республикасига кириб келгани тўғрисидаги ҳужжатлари бўлмаган 27 дона картон қутида 11  хил номдаги жами 4 036 дона электрон сигарета топилди. Электрон сигареталар қиймати 976.010.000 сўмни ташкил этиши аниқланди.

    Ц.Ц Ўзбекистон Республикаси ЖКнинг 1861-моддаси 4-қисми “а” бандида назарда тутилган жиноятни содир қилганликда айбли деб топилди. Унга ҳисоблаш миқдорининг 200 (икки юз) баравари миқдорида, яъни 75.000.000 сўм жарима жазоси тайинланди.

  • BOLAJON ТЕЛЕКАНАЛИДА КАТТАЛАР ЎЙИНИ

    BOLAJON ТЕЛЕКАНАЛИДА КАТТАЛАР ЎЙИНИ

    МТРК таркибидаги Bolajon телеканали болаларга тарбия, билим ва эртак улашиши керак. Аммо каналда фитна-фасод ғужғон қайнаб,  самимий муҳит йўқ бўлиб кетганидан жамоанинг ўзи ҳам норози.

    Канал раҳбари Дилбар Усмонова бир неча бор “Элтуз звезда” бўлгач, жамоадошлари орасида қора рўйхат шакллантира бошлади.

    Каналнинг самарали ижодкорларидан бири – Чарос Наримонова ёшлар орасида бир пайтлар жуда машҳур бўлган “Рўзғор мактаби” кўрсатувининг муаллифи сифатида танилган.

    Бироқ манбаларга кўра, ҳозир Наримонова канал ичида деярли “кўринмас одам”га айлантирилган.

    Наримонова жамоанинг телеграм гуруҳларидан чиқариб юборилган,  мажлисларга чақирилмайди,  тадбирларга таклиф қилинмайди, утайёрлаган кўрсатувлар тасдиқланмайди.

    Сабаб эса жуда жўн – раҳбарият билан муносабат яхши эмас. Бош оператор Илдар Юнусов ҳам асоссиз равишда лавозимидан туширилган.

    Кўп йиллик тажрибага эга режиссёр Шерзод Расулов ҳам канални тарк этди. Манбаларга кўра, унинг ролик ва кўрсатувлари қайта-қайта кўрикдан ўтмай қолавергач, у “ўз хоҳишига кўра” ишдан кетган. Худди шундай ҳолат Mоҳир Солиев билан ҳам бўлгани айтилмоқда.

    Бошқа томондан канал раҳбарининг жияни ярим штатда ишлаб бирваракайига уч кўрсатув билан эфирни эгаллаган.

    “Бошқа ижодкорлар эса бир дона кўрсатув очиш учун йиллаб рухсат кутиб юради. Баъзи кўрсатувлар эфирга бир кун олдин топширилмаса, бекор қилинади. Аммо айрим “махсус” лойиҳалар эфирга 3–4 соат қолганда ҳам чиқиб кетаверади” – дейди ходимлар

    Телканал студияларида мусиқали катта кўрсатувлар очиш ҳам осон эмас. Чунки бундай лойиҳа раҳбар муаллифлигидаги “Болажон шоу”га рақобат бўлиб қолиши мумкин.

    Шу сабаб, баъзи ижодкорлар янги ғояларни тарғиб қилиш ўрнига ҳадиксираб эҳтиёткорлик билан ишлашга мажбур бўлмоқда.

  • ТУҲМАТЧИ КУЁВ ЖАРИМАГА ТОРТИЛДИ

    ТУҲМАТЧИ КУЁВ ЖАРИМАГА ТОРТИЛДИ

    Фарғоналик ишсиз ва такасалтанг М.У 500 та обуначиси бўлган телеграмм гуруҳларига қайнотасини ҳақоратлаб ва унга туҳмат қилиб турли смслар ёзиб қолдирган.

    Жумладан,  “Хотини билан ҳажга бориш учун қизларни сотиб, пулига кетяпти”, “Шу одамга ҳажга боришига пул йиғиб беринглар”, “Куёвининг уйини сотиб, пулига ҳажга кетяпти” мазмунидаги хабарлар билан бирга қайнотасининг суратларини ҳам давомий жойлаб борган.

    Қонун кучга киргач эса тимсоҳ кўз ёшларини тўка бошлаган куёв бу ишларни оилавий низо сабаб қилганини айтиб, пушаймонлик билдирган. Аммо унинг сохта кўз ёшларига қайнотаси ишонмаганда одил суд ишонармиди?

    М.У Ўзбекистон Республикаси ЖКнинг 139-моддаси 3-қисми “г” банди, 140-моддаси 2-қисми ва 1412-моддаси 2-қисми “в” бандида назарда тутилган жиноятларни содир қилганликда айбли деб топилди.

    Унга базавий ҳисоблаш миқдорининг 25 баравари яъни, 10.300.000 сўм жарима жазоси тайинланди.

    Қайнота – отадек гап. Уни уни ўз отасидек севиб, ардоқламаса ҳам, ҳеч бўлганда унга туҳмат қилмаш керак! Аммо буни тушунадиган куёв қайда дейсиз…

  • РАССОМ ТУЗ ТЕЛЕГРАМ КАНАЛИ БЛОКЛАНДИ

    РАССОМ ТУЗ ТЕЛЕГРАМ КАНАЛИ БЛОКЛАНДИ

    Телеграмда Рассом Туз сатирик канали блокланди. Кўпчилик 7 мингдан зиёд телеграм каналининг ёпилишини Ўзбекистон ҳукуматидаги айрим мулозимларнинг “сай ҳаракатлари” натижаси деб ҳисобламоқда.

    Бир ойча олдин Рассом Тузнинг фейсбукдаги саҳифаси блокланган эди.

    Икки ҳафта муқаддам эса Элтуз телеграм канали айни шаклда блокланган эди. Элтуз журналистлари ҳозирда Элтузар бренди билан барча платформаларда фаолият олиб бормоқда.

    Ўзбекистон ҳукумати томонидан мухолиф ёки танқидий контентлар ёпилиши сўнгги кунларда авжига чиқди.

    Ҳукумат ҳар қанча информацион майдонни назорат қилишга, танқидий журналистикани чеклашга ҳаракат қилмасин, бу ҳаракатлари зое кетаётганини кўриш мумкин.

    Канал – фақатгина ёзиладиган дафтар, у йиртиб ташлангани билан ёзадиган қалам бошқа вароқ олиб бўлса ҳам ёзаверади.

    Конституцияда қатъий белгиланган цензура мавжуд бўлмаслиги ҳақидаги принсип ҳукуматнинг ўзи томонидан бузиб турилса, фуқаролар олдида нима деган ҳукумат бўлади у?

    Медиа майдонида қанчадан-қанча экстремизм ёки жиноятга алоқадор саҳифалар бор, аммо давлат реал хавф билан эмас, уни айтовчилар билан курашар экан, ҳали-бери рўшнолик кўрмаса керак.

  • “ЎЗЙЎЛКЎПРИК” МАНСАБДОРИ ПОРА БИЛАН УШЛАНДИ

    “ЎЗЙЎЛКЎПРИК” МАНСАБДОРИ ПОРА БИЛАН УШЛАНДИ

    Йўл қурилиши соҳасида яна бир сермазмун “ислоҳот” фош бўлди. Қорақалпоғистондаги мансабдорлардан бири, чамаси, давлат тизимини тендер орқали эмас, “таниш-билиш” орқали бошқариш мумкин, деб ўйлаган.

    Хабарга кўра, “Ўзйўлкўприк” кластери давлат муассасасининг Қорақалпоғистон Республикаси филиали мансабдор шахси қурилиш билан шуғулланувчи МЧЖга жуда “қулай” таклиф берган: “Беруний-Тўрткўл” А380 магистрал йўли қурилишидаги 5 километрлик иш ҳажмини олиб бераман, фақат хизмат ҳақи сифатида 10 минг доллар узатасиз”.

    Яъни давлат буюртмаси, очиқлик, ҳалол танлов, қонуний тендер деган тушунчалар бир ёқда, “юқорида танишлар бор” деган қадимий ва синақдан ўтган коррупцион технология бир ёқда. Мансабдор, кўринадики, йўл қуришдан кўра “йўл қилиб бериш”ни яхшироқ ўзлаштирган.

    Энг қизиғи, 5 километрлик иш ҳажми ҳали расман бошланмасиданоқ, 10 минг долларлик “руҳий тайёргарлик” пули сўралган. Шундай пайтда одам ўйлаб қолади: бу йўлга асфальт ётқизиладими ёки аввал поранинг устидан смета тузиладими?

    Бироқ режа қоғозда чиройли кўрингани билан, амалда у қадар узоққа бормади. Давлат хавфсизлик хизмати ходимлари тезкор тадбир ўтказиб, мансабдорни сўралган маблағни МЧЖ раҳбаридан олаётган пайтда шаппа босди. Қисқаси, у 5 километрлик йўлни “олиб бериш”га улгурмади, лекин ўзи тўғридан тўғри қамаққа йўл олди.

    Ҳозирда унга нисбатан тегишли моддалар асосида жиноят иши қўзғатилган, тергов кетмоқда.

    Бу воқеадан чиқадиган хулоса оддий: айрим амалдорлар йўл соҳасида ишласа-да, ўзлари доим айланма йўл қидиради. Лекин бу сафар айланма йўл ҳам ёрдам бермади.