Eltuzar

Tag: Хабар

  • ЭНЕРГИЯ РЕСУРСЛАРИДАН ФОЙДАЛАНИШ ҚОИДАЛАРИНИ БУЗГАНЛАР УЧУН АНИҚ ЖАЗО ТАЙИНЛАНМОҚДА

    ЭНЕРГИЯ РЕСУРСЛАРИДАН ФОЙДАЛАНИШ ҚОИДАЛАРИНИ БУЗГАНЛАР УЧУН АНИҚ ЖАЗО ТАЙИНЛАНМОҚДА

    Энергия ресурсларидан фойдаланиш қоидаларини бузганлар учун аниқ жазо йўқ эди. Бу бўйича муҳокамалардан сўнг аниқ жазо тартиблари ишлаб чиқилди.

    Ўзбекистонда энергия ресурсларидан фойдаланиш қоидаларини бузганлик учун жавобгарлик кучайтирилади, Элтузар хабар беради Адлия вазирлиги манбасига таяниб.

    Умумий фойдаланишдаги тармоқларга (электр, иссиқлик, газ) ўзбошимчалик билан уланиш ёки улардан фойдаланиш қоидаларини бошқача тарзда бузиш фуқароларга БҲМнинг 15 бараваридан 20 бараваригача (6,1 млн сўмдан 8,2 млн сўмгача), мансабдор шахсларга эса 25 бараваридан 30 бараваригача (10,3 млн сўмдан 12,3 млн сўмгача) миқдорда жарима солишга сабаб бўлади.

    Тижорат мақсадларида қоидабузарлик БҲМнинг 15 бараваридан 25 бараваригача (6,1 млн сўмдан 10,3 млн сўмгача) жарима ёки 15 суткагача маъмурий қамоқ билан жазоланади.

    Жиноят кодексига киритилган ўзгартиришларга мувофиқ, маъмурий жазо қўлланилганидан кейин содир этилган жиноят БҲМнинг 30 бараваридан 75 бараваригача (12,3 млн сўмдан 30,9 млн сўмгача) миқдорда жарима ёки 240 соатгача мажбурий жамоат ишлари ёхуд бир йилгача ахлоқ тузатиш ишлари билан жазоланади.

    Қайд этилишича, қонун 3 ойдан кейин кучга киради.

  • ТРАМП: АҚШГА ЭРОН ДРОНЛАРИДАН ҲИМОЯЛАНИШДА УКРАИНА ЁРДАМИ КЕРАК ЭМАС

    ТРАМП: АҚШГА ЭРОН ДРОНЛАРИДАН ҲИМОЯЛАНИШДА УКРАИНА ЁРДАМИ КЕРАК ЭМАС

    Дональд Трамп Fox News’га берган интервьюсида АҚШга Украинадан дронларга қарши мудофаа бўйича ёрдам керак эмаслигини айтди.

    “Йўқ, бизга (Украинанинг) дронлардан ҳимояланиш бўйича ёрдами керак эмас. Биз дронлар ҳақида ҳаммадан кўпроқ биламиз. Аслида, дунёдаги энг яхши дронлар бизда,”

    деди Трамп.

    Киев эса АҚШ ва Яқин Шарқ мамлакатларига Эроннинг зарба берувчи дронларига қарши курашиш бўйича ўзининг жанговар тажрибаси ва технологиялари билан ўртоқлашишни таклиф қилган.

    Украина президенти Владимир Зеленский жума куни 10 дан ортиқ давлат Киевдан ёрдам сўраганини маълум қилди. Унинг айтишича, Украина мутахассислари аввалроқ Саудия Арабистони, Қатар ва БААга юборилган.

  • ТОШКЕНТДА ЙПХ ИНСПЕКТОРИНИ УРИБ ЮБОРГАН ЯНА БИР ҲАЙДОВЧИГА ҲУКМ ЎҚИЛДИ

    ТОШКЕНТДА ЙПХ ИНСПЕКТОРИНИ УРИБ ЮБОРГАН ЯНА БИР ҲАЙДОВЧИГА ҲУКМ ЎҚИЛДИ

    Тошкент шаҳрида ЙПХ инспекторини уриб юборган ҳайдовчига нисбатан суд ҳукми эълон қилинди.

    Маълумотларга кўра, 2024 йилда BYD Han русумли автомобилни ҳайдовчилик гувоҳномасисиз бошқарган ҳайдовчи тахминан 100 км/соат тезликда ҳаракатланган. Шу вақт ҳудудда хизмат олиб бораётган 4-батальон, 2-сафарбарлик гуруҳи ЙПХ инспектори уни тўхташга чақирган.

    Бироқ ҳайдовчи қонуний талабга бўйсунмаган ва ҳаракатни давом эттириб, инспекторни уриб юборган.

    Оқибатда ЙПХ ходими оғир жароҳат олиб, шифохонага ётқизилган. У 8 кун реанимацияда ётган, 34 кундан кейин ҳушига келган. Инспектор 6 ой даволанган ва бир йилдан сўнг хизматга қайтган.

    Мазкур иш Чилонзор туман судида кўриб чиқилди. Суд қарорига кўра, айбланувчи Жиноят кодексининг 104-моддаси 2-қисми “б” банди ҳамда 219-моддаси 2-қисми билан айбдор деб топилди.

    Унга 6 йил озодликдан маҳрум қилиш жазоси тайинланди. Ҳисоб-китобларга кўра, узил-кесил 5 йил 2 ой 9 кун озодликдан маҳрум қилиш жазоси қолдирилди.

    Айбланувчи суд залининг ўзида қамоққа олинди.

  • ОДАМЛАРНИ “ЧУВ” ТУШИРГАН ФИРИБГАР УШЛАНДИ

    ОДАМЛАРНИ “ЧУВ” ТУШИРГАН ФИРИБГАР УШЛАНДИ

    Судланувчи М.К фуқаро Х.Х.ни алдаб, унга 300 АҚШ долларини 3.630.000 сўмга алмаштириб беришини ваъда қилган. Жабрланувчини пул санаш вақтида чалғиганидан фойдаланиб, унга бериши керак бўлган жами 3.630.000 сўмдан 1.350.000 сўм кам берган. Жабрланувчининг 1.350.000 сўм маблағини эса фирибгарлик йўли билан қўлга киритиб, шахсий эҳтиёжлари учун сарфлаб юборган.

    Бундан ташқари, М.К яна бир фуқаро Р.Рни ҳам алдаб, унга 50.000 қирғиз сомини 7.000.000 сўмга алмаштириб беришини ваъда қиллган. Унга бериши керак бўлган жами 7.000.000 сўмдан 2.000.000 сўмини чўнтакка урган.

    “Ўрганган кўнгил ўртанса қўймас”, деганларидек, М.К яна бир фуқарони чув туширгани маълум бўлди. Фуқаро Н.Н га 100 АҚШ долларини 1.200.000 сўмга алмаштириб беришини ваъда қилиб, 1.200.000 сўмдан 500.000 сўм кам берган6.

    Фирибгарликни ўзига касб қилиб олган К.М. Ўзбекистон Республикаси ЖК 168-моддаси 3-қисмининг “б” бандида назарда тутилган жиноятни содир этганликда айбдор деб топилгач унга нисбатан ойлик иш ҳақининг 20 (йигирма) фоизини давлат даромадига ушлаб қолган ҳолда 2 (икки) йил ахлоқ тузатиш ишлари жазоси тайинланди. Фирибгар ҳунарини ахлоқ тузатиш жараёнида давом эттирса ажабмас…

  • НЕТАНЬЯХУ: АҚШ ВА ИСРОИЛ ЭРОН ҲАМДА «ҲИЗБУЛЛОҲ»НИ ТОР-МОР ЭТДИ

    НЕТАНЬЯХУ: АҚШ ВА ИСРОИЛ ЭРОН ҲАМДА «ҲИЗБУЛЛОҲ»НИ ТОР-МОР ЭТДИ

    “Биз Эрон ва «Ҳизбуллоҳ»ни тор-мор этдик. «Ҳизбуллоҳ» қуролларимизнинг кучини ҳис қилмоқда ва буни янада кучлироқ ҳис қилади. У ўз тажовузи учун жуда оғир бадал тўлайди”
    — деди Исроил бош вазири Биньямин Нетаньяҳу жанговар ҳаракатлар бошланганидан бери ўтказилган илк матбуот анжумани чоғида.

    “Исроил ва АҚШ кучларининг мисли кўрилмаган даражада бирлашиши туфайли биз улкан ютуқларга эришдик — шундай ютуқларки, улар Яқин Шарқдаги ва ҳатто ундан ташқари ҳудудлардаги кучлар мувозанатини ўзгартирмоқда“
    , — деб бош вазирдан иқтибос келтиради Times of Israel нашри.

    У, шунингдек, пайшанба куни номидан баёнот эълон қилинган Эроннинг янги олий раҳбари Мужтабо Ҳоманаий ҳалигача жамоатчилик олдида кўринмаганига ҳам эътибор қаратди.

    Брифингдан сал аввал Исроил мудофаа армияси Теҳронда «кенг кўламли ҳужумлар тўлқини» бошланганини маълум қилди. Айтилишича, ушбу ҳужумлар пойтахт бўйлаб Эрон режими инфратузилмасига қаратилган.

  • МУЖТАБО ХОМАНАИЙ: ШАҲИДЛАР УЧУН ҚАСОС ОЛАМИЗ

    МУЖТАБО ХОМАНАИЙ: ШАҲИДЛАР УЧУН ҚАСОС ОЛАМИЗ

    Эроннинг янги олий раҳбари Мужтабо Хоманаий халққа илк бор мурожаат қилди. У АҚШ ва Исроил зарбалари оқибатида ҳалок бўлганлар учун қасос олинишини айтди ва Ҳурмуз бўғози блокадаси давом этишини билдирди.

    Шу билан бирга, Эрон минтақадаги давлатларга янги зарбалар берди, яна учта савдо кемаси шикастланди. Бу ҳолат фонида нефть нархи яна кўтарилмоқда.

    Айни пайтда АҚШ ва Исроил Эрон ҳудудидаги объектларга ҳужумларни давом эттиряпти, ЦАХАЛ эса Ливан ҳудудини ўққа тутмоқда.

    Мурожаат матни Эрон давлат телевидениесида диктор томонидан ўқиб эшиттирилди, Хоманаийнинг ўзи эса оммага кўрсатилмади. Reuters маълумотига кўра, у енгил жароҳат олган бўлиши мумкин.

    Хоманаий ўз баёнотида:
    “«Шаҳидларимизнинг қони учун қасоссиз қолмаймиз»,”
    дея таъкидлади.

  • ТОШКЕНТДА БИР АСР ХИЗМАТ ҚИЛИШИ АЙТИЛГАН ЙЎЛ ЎТКАЗГИЧ 2 ЙИЛГА ЕТМАЙ ЎПИРИЛИБ ТУШДИ

    ТОШКЕНТДА БИР АСР ХИЗМАТ ҚИЛИШИ АЙТИЛГАН ЙЎЛ ЎТКАЗГИЧ 2 ЙИЛГА ЕТМАЙ ЎПИРИЛИБ ТУШДИ

    Темур Малик кўчаси ва Буюк Ипак йўли кўчаси чорраҳасида жойлашган йўл ўтказгичнинг бир қисми ўпирилиб тушди. Ушбу иншоот 2024 йил август ойида фойдаланишга топширилган бўлиб, унинг қурилишига 128,6 млрд сўм маблағ сарфланган эди.

    Маълумотларга кўра, йўл ўтказгичнинг хизмат муддати 100 йилга мўлжаллангани айтилган. Бироқ орадан қарийб икки йил ҳам ўтмасдан, иншоотнинг бир қисмида ўпирилиш содир бўлди. Ҳодиса жамоатчилик орасида кенг муҳокамаларга сабаб бўлмоқда.

    Элтузарга келган маълумотларга кўра, ҳодиса жойига Тошкент шаҳар ҳокими, мутасадди ташкилотлар раҳбарлари ҳамда мутахассислар етиб бориб, вазиятни ўрганишни бошлади. Ҳудудда хавфсизлик чоралари кучайтирилиб, транспорт ҳаракати вақтинча чекланди.

    Шаҳар ҳокимиятининг дастлабки изоҳига кўра, ҳодисага кучли ёғингарчилик сабаб бўлган бўлиши мумкин. Шу билан бирга, мутахассислар томонидан лойиҳа ҳужжатлари, қурилиш ишларининг сифати, шунингдек дренаж ва сув чиқариш тизимининг ҳолати атрофлича текширилмоқда.

    Текширув натижаларига кўра, воқеага аниқ нима сабаб бўлгани ва масъуллар ҳақида қўшимча маълумот берилиши кутилмоқда.

  • КОРЕЯДА ЗАВОДДА ЎЗБЕКИСТОНЛИК ИШЧИ ҲАЛОК БЎЛДИ

    КОРЕЯДА ЗАВОДДА ЎЗБЕКИСТОНЛИК ИШЧИ ҲАЛОК БЎЛДИ

    Жанубий Кореянинг Сосан шаҳридаги металлургия корхонасида ишлаб юрган 50 ёшдан ошган Ўзбекистон фуқароси бахтсиз ҳодиса оқибатида вафот этди.

    Полиция маълумотига кўра, 8 март куни соат 21:46 атрофида Seosan Auto Valley саноат ҳудудидаги заводда ишчига юк кўтаргич уриб кетган. Оқибатда у металл буюмлар остида қолиб кетган.

    Жабрланувчи юраги тўхтаган ҳолатда шифохонага олиб борилган, аммо уни сақлаб қолишнинг иложи бўлмаган.

    Дастлабки маълумотларга кўра, юк кўтаргич ҳайдовчиси техника олдида турган ишчини пайқамай қолган. Ҳозир фожиа юзасидан полиция ва меҳнат инспекцияси томонидан тергов олиб борилмоқда.

    Қайд этилишича, корхонада беш нафардан ортиқ ходим ишлагани учун ҳолат “ишлаб чиқаришдаги жиддий авариялар” тўғрисидаги қонун доирасида кўриб чиқилмоқда.

  • 20 ЯШАР СУКУНАТ КАНАЛИ ЭГАСИГА СУД ҲУКМИ

    20 ЯШАР СУКУНАТ КАНАЛИ ЭГАСИГА СУД ҲУКМИ

    2006 йили туғилган ва умр бўйи бекорчилик қилиб зериккан қизпошша диний радикаллик градуси ошиб, ўзини уммат онаси ролида кўра бошлади. У Афғонистондаги Умомахон ва гўёки Қирғизистонлик Ғуроба деган кимсалар таъсирига тушиб телеграмда диний ақидапарастлик руҳидидаги «Сукунат» каналини очди.

    Канал эгаси 2024 йил май ойидан буён турли экстримистик видео, аудио ва pdf материаллар тарқатиш билан шуғулланиб келган. Тарқатилган манбалар сирасида демоктратия тоғут ва куфур тузим деб номланади, шариат қиличини тутиш шартлиги ҳақида жанговар тарғиботлар аниқланди.

    Чиноз туман суди ҳаваскор уммат энасига 3 йил озодликни чеклаш жазосини қўллади. Энди уйда совчи кутади.

  • ДАСТЛАБКИ ТЕРГОВ ХУЛОСАЛАРИГА КЎРА, ЭРОНДАГИ МАКТАБГА БЕРИЛГАН ЗАРБАНИ АҚШ АМАЛГА ОШИРГАН — NYT

    ДАСТЛАБКИ ТЕРГОВ ХУЛОСАЛАРИГА КЎРА, ЭРОНДАГИ МАКТАБГА БЕРИЛГАН ЗАРБАНИ АҚШ АМАЛГА ОШИРГАН — NYT

    Дастлабки тергов шуни кўрсатдики, 28 февраль куни Эрон жанубидаги «Шажараи Тойиба» бошланғич мактаби биносига берилган зарба нишонни аниқлашда АҚШ ҳарбийлари йўл қўйган хато натижаси бўлган. Улар Ислом инқилоби қўриқчилари корпуси базасига зарба берган, мактаб биноси эса илгари ушбу базанинг бир қисми бўлган, деб ёзади New York Times (NYT) хабардор манбаларга таяниб.

    Уларнинг айтишича, АҚШ Марказий қўмондонлиги офицерлари зарба учун нишон координаталарини Пентагон Разведка бошқармаси томонидан тақдим этилган эскирган маълумотлар асосида тузган.

    Мактаб 28 февраль куни АҚШ ва Исроил операциясининг биринчи кунида ракета ҳужумига учраган. Таҳлиллар шуни кўрсатдики, мактаб ёнидаги ҳарбий базага америкаликларнинг Tomahawk ракетаси зарба берган. АҚШ президенти Дональд Трамп эса бу зарба учун жавобгарлик Эрон зиммасида эканини айтган эди.

    NYT суҳбатлашган расмийлар таъкидлашича, бу хулосалар дастлабки ҳисобланади ва эскирган ахборот нима учун қайта текширилмагани ҳақида ҳал этилмаган муҳим саволлар ҳали ҳам мавжуд.

    “Болаларга тўла мактабга қилинган ҳужум, шубҳасиз, сўнгги ўн йилликлардаги энг вайронкор ҳарбий хатолардан бири сифатида тарихга киради. Эрон расмийлари ҳалок бўлганлар сони камида 175 нафарни ташкил этганини, уларнинг аксарияти болалар эканини билдирмоқда”, — деб ёзади NYT.