Eltuzar

Category: Ўзбекистон

  • ИСТЕЪДОДЛАР ИССИҚХОНАДА ЯШАМАЙДИ

    ИСТЕЪДОДЛАР ИССИҚХОНАДА ЯШАМАЙДИ

    Тўртта сўзни улаб сал-пал равон гапирган ёшлар истеъдодли деб тамғаланадиган даврда яшаяпмиз. Катта ваъдалар бера олган, ишонч билан хушомад қўёлган ҳамма иқтидорли деб аталадиган тузумда яшаяпмиз.

    Олимпиадада чемпион бўлганларга давлат қулоч-қулоч совға, мукофот беради. Асли бу бизнеснинг вазифаси. Бозор шароитида тадбиркорлар ўз маҳсулотини реклама қилиш учун машҳур спортчи ёшларни чақириши, истеъдодларни ёллаши керак.

    Масалан, Португалия ҳукумати Англия лигасида илк маротаба иштирок этган Криштиану Роналдуга бош-оёқ сарпо, Лиссабон ситидан уй бермаган. Роналду ўз йўлини топиб қимматбаҳо легионерга айланди. Аслида истеъдодли одамни ортиқча эркалаш хато. У оддий одамлардан кучлироқ ва курашувчанроқ бўлганида истеъдоди тўла юзага чиқади.

    Шундай экан, тўртта китоб ўқиган жиблажибонларни мошин билан сийлаш, олимпиада ғолибларига қатор-қатор сарпо қилиш анъанасига стоп дейлик. Таъмагирлик бора-бора бор истеъдодни ҳам ўлдиришини спортчилар, Зулфиячилар юзлаб маротаба исботлашди.

    Мукофотлар табиий бозор шароитидан келиб чиқиши – реклама шартномалари кўринишига ўтиши шарт. Бюджет пулларини қўшимча қиймат яратадиган соҳаларга сарфлаш зарур.

  • ЭНЕРГИЯ РЕСУРСЛАРИДАН ФОЙДАЛАНИШ ҚОИДАЛАРИНИ БУЗГАНЛАР УЧУН АНИҚ ЖАЗО ТАЙИНЛАНМОҚДА

    ЭНЕРГИЯ РЕСУРСЛАРИДАН ФОЙДАЛАНИШ ҚОИДАЛАРИНИ БУЗГАНЛАР УЧУН АНИҚ ЖАЗО ТАЙИНЛАНМОҚДА

    Энергия ресурсларидан фойдаланиш қоидаларини бузганлар учун аниқ жазо йўқ эди. Бу бўйича муҳокамалардан сўнг аниқ жазо тартиблари ишлаб чиқилди.

    Ўзбекистонда энергия ресурсларидан фойдаланиш қоидаларини бузганлик учун жавобгарлик кучайтирилади, Элтузар хабар беради Адлия вазирлиги манбасига таяниб.

    Умумий фойдаланишдаги тармоқларга (электр, иссиқлик, газ) ўзбошимчалик билан уланиш ёки улардан фойдаланиш қоидаларини бошқача тарзда бузиш фуқароларга БҲМнинг 15 бараваридан 20 бараваригача (6,1 млн сўмдан 8,2 млн сўмгача), мансабдор шахсларга эса 25 бараваридан 30 бараваригача (10,3 млн сўмдан 12,3 млн сўмгача) миқдорда жарима солишга сабаб бўлади.

    Тижорат мақсадларида қоидабузарлик БҲМнинг 15 бараваридан 25 бараваригача (6,1 млн сўмдан 10,3 млн сўмгача) жарима ёки 15 суткагача маъмурий қамоқ билан жазоланади.

    Жиноят кодексига киритилган ўзгартиришларга мувофиқ, маъмурий жазо қўлланилганидан кейин содир этилган жиноят БҲМнинг 30 бараваридан 75 бараваригача (12,3 млн сўмдан 30,9 млн сўмгача) миқдорда жарима ёки 240 соатгача мажбурий жамоат ишлари ёхуд бир йилгача ахлоқ тузатиш ишлари билан жазоланади.

    Қайд этилишича, қонун 3 ойдан кейин кучга киради.

  • ТОШКЕНТДА ЙПХ ИНСПЕКТОРИНИ УРИБ ЮБОРГАН ЯНА БИР ҲАЙДОВЧИГА ҲУКМ ЎҚИЛДИ

    ТОШКЕНТДА ЙПХ ИНСПЕКТОРИНИ УРИБ ЮБОРГАН ЯНА БИР ҲАЙДОВЧИГА ҲУКМ ЎҚИЛДИ

    Тошкент шаҳрида ЙПХ инспекторини уриб юборган ҳайдовчига нисбатан суд ҳукми эълон қилинди.

    Маълумотларга кўра, 2024 йилда BYD Han русумли автомобилни ҳайдовчилик гувоҳномасисиз бошқарган ҳайдовчи тахминан 100 км/соат тезликда ҳаракатланган. Шу вақт ҳудудда хизмат олиб бораётган 4-батальон, 2-сафарбарлик гуруҳи ЙПХ инспектори уни тўхташга чақирган.

    Бироқ ҳайдовчи қонуний талабга бўйсунмаган ва ҳаракатни давом эттириб, инспекторни уриб юборган.

    Оқибатда ЙПХ ходими оғир жароҳат олиб, шифохонага ётқизилган. У 8 кун реанимацияда ётган, 34 кундан кейин ҳушига келган. Инспектор 6 ой даволанган ва бир йилдан сўнг хизматга қайтган.

    Мазкур иш Чилонзор туман судида кўриб чиқилди. Суд қарорига кўра, айбланувчи Жиноят кодексининг 104-моддаси 2-қисми “б” банди ҳамда 219-моддаси 2-қисми билан айбдор деб топилди.

    Унга 6 йил озодликдан маҳрум қилиш жазоси тайинланди. Ҳисоб-китобларга кўра, узил-кесил 5 йил 2 ой 9 кун озодликдан маҳрум қилиш жазоси қолдирилди.

    Айбланувчи суд залининг ўзида қамоққа олинди.

  • БУ ЭНДИ БЕДОДЛИК ЭМАС, ОЧИҚЧАСИГА ХАЛҚНИ МАСХАРА ҚИЛИШ!

    БУ ЭНДИ БЕДОДЛИК ЭМАС, ОЧИҚЧАСИГА ХАЛҚНИ МАСХАРА ҚИЛИШ!

    Сув омбори ёрилиб, ўнлаб қишлоқлар сув тагида қолди. Изоҳ тайёр: “балиқлар тешибди”.

    Бундай аҳмоқона баҳона билан халқни алдашни қачон тўхтатасизлар ўзи?

    Тошкентда ҳали расман топширилмаган кўприк қулаб тушди. Одатидагидек, бир нечта майдароқ мулозимни қурбон қилиб, асосий айбдорлар четда қолиб, ишни босди-босди қилишди. Тамом. Гўё ҳеч нарса бўлмагандек.

    Кеча эса Тошкентда йўл ўтказгичнинг бир қисми ўпирилиб тушди. Шаҳар ҳокимиятининг дастлабки изоҳи эса кулгили ҳам эмас, ҳақоратли: эмишки, сабаб кучли ёғингарчилик бўлиши мумкин.

    Ёғингарчиликми? Нима, бу иншоот қоғоздан қурилганмиди? Ёки цемент ўрнига лой ишлатилганмиди?

    Бу объект 2024 йил августда фойдаланишга топширилган. Қурилишига 128,6 миллиард сўм сарфланган. Яна хизмат муддати 100 йил деб айтишган. 100 йилга чидайди, дейилган иншоот икки йилга етмай қулаяпти. Нураган пахса девор ҳам бундан ортиқроқ чидайди. Бу қурилиш эмас, бу – бюджетни очиқча талаб, халқ устидан сийишдир. Буларга халқ қирилиб кетсаям фарқи йўқ!

    Президент Шавкат Мирзиёев бир йиғилишда:
    “Ўғри бўл, қароқчи бўл, инсоф билан бўл”, деган эди. Лекин буларда на инсоф бор, на виждон, на масъулият. Буларда фақат ейиш бор. Ўпқонга ўхшайди. Ҳўпла оғзим, ҳўпла, деб, ямламай ютаверишади. Қанча кўп бўлса, шунча яхши. Халқ қирилиб кетмайдими уларга қолса.

    Ҳокимият тепасида ўтирганларнинг энг қўрқинчли жиҳати шуки: улар ҳам ўғри, ҳам инсофсиз. Фақат мансабни эмас, одамларнинг сабрини, ризқини, хавфсизлигини, эртанги кунига бўлган ишончини ҳам ўғирлашяпти. Нақадар даҳшатли симбиоз.

    Тўғри, тан берганмиз! Ўғриламасаларинг тура олмайсанлар. Бу сенларнинг қонингга сингиб кетган. Майли, еб-ичинглар, заҳар заққум бўлсин – бўкканларингача енглар, таланглар. Халқ ҳозиргача чидаган, бундан кейин ҳам чидайди.

    Лекин, ҳеч бўлмаса, ҳаддан ошманглар. Бирйўла 80 фоизни шилиб кетманглар. Инсоф қилиб, ярмини қолдиринглар. Ахир халққа ҳам бирон нарса тегсин. Йўл ҳам, кўприк ҳам, сув омбори ҳам одамлар учун қурилади, сизларнинг чўнтагингиз учун эмас.

    Халқни ҳар томонлама эзиб, устидан яна изоҳларингиз билан ҳақорат қиляпсизлар. Айланиб ҳам зўрлаяпсизлар, ўргилиб ҳам зўрлаяпсизлар. Зўрланадиган жойнинг ўзи ҳам илма-тешик бўлиб кетди.

  • “У БИР СЎМ ҲАМ СЎРАМАГАН”: СИРОЖИДДИН ҲАҚИДА ЭЛТУЗАРГА КЕЛГАН ТАЪСИРЛИ МАКТУБ

    “У БИР СЎМ ҲАМ СЎРАМАГАН”: СИРОЖИДДИН ҲАҚИДА ЭЛТУЗАРГА КЕЛГАН ТАЪСИРЛИ МАКТУБ

    Элтузар таҳририятига Сирожиддин Медиа асосчиси Сирожиддин Одилов ҳақида қуйидаги мазмунда мактуб келди. Унда муаллиф блогерга нисбатан айталаётган айбловларни рад этиб, унинг инсонларга қилган ёрдамини эслайди:

    “Сирожиддин виждонли, мард йигит. Уни пора олди, фирибгарлик қилди, дейишаётганлар ёлғон гапиряпти, деб ҳисоблайман. Ҳа, бугун у қамоқда. Аммо ичкарига тушган одам зиммасига исталган тухматни юклаш мумкинлигини кўпчилик билади.

    Айримлар бу гапларни ҳатто муборак рўза ойида ҳам тарқатяпти. Ахир, кўзингиз билан кўриб, қўлингиз билан ушлаганмисиз? Худодан қўрқинглар.

    Мен вилоятдаги чекка қишлоқда яшайман. Сирожиддин 7-8 ой давомида менинг қизим ва невараларимга ёрдам берди. Қизимни қамоқдан озод қилишга ҳаракат қилди, болаларини бағрига қайтаришга кўмаклашди. Худо кўриб турибди, у бир сўм ҳам олгани йўқ, ҳатто сўрамаган ҳам.

    Тошкентдан Навоийга қатнади, бензинига ҳам пул сўрамади. Бизнинг шароитимиз йўқлигини кўриб турса ҳам, ёрдамини аямады. Мен бошқа таниқли блогерлардан ҳам ёрдам сўраганман. Аммо пулимиз йўқлигини айтганимдан кейин, Сирожиддиндан бошқа ҳеч ким келмаган.

    Бир оёғим гўрда турибди, шунинг учун фақат ҳақиқатни айтяпман. Худо ҳар бир бандасини ўт балосидан ҳам, тухмат балосидан ҳам асрасин. У менинг невараларимга онасини қайтаришга ёрдам берган эди. Илоҳим, Сирожиддин ҳам ўз оиласи бағрига қайтсин. Дуодамиз шундай”.

  • ОДАМЛАРНИ “ЧУВ” ТУШИРГАН ФИРИБГАР УШЛАНДИ

    ОДАМЛАРНИ “ЧУВ” ТУШИРГАН ФИРИБГАР УШЛАНДИ

    Судланувчи М.К фуқаро Х.Х.ни алдаб, унга 300 АҚШ долларини 3.630.000 сўмга алмаштириб беришини ваъда қилган. Жабрланувчини пул санаш вақтида чалғиганидан фойдаланиб, унга бериши керак бўлган жами 3.630.000 сўмдан 1.350.000 сўм кам берган. Жабрланувчининг 1.350.000 сўм маблағини эса фирибгарлик йўли билан қўлга киритиб, шахсий эҳтиёжлари учун сарфлаб юборган.

    Бундан ташқари, М.К яна бир фуқаро Р.Рни ҳам алдаб, унга 50.000 қирғиз сомини 7.000.000 сўмга алмаштириб беришини ваъда қиллган. Унга бериши керак бўлган жами 7.000.000 сўмдан 2.000.000 сўмини чўнтакка урган.

    “Ўрганган кўнгил ўртанса қўймас”, деганларидек, М.К яна бир фуқарони чув туширгани маълум бўлди. Фуқаро Н.Н га 100 АҚШ долларини 1.200.000 сўмга алмаштириб беришини ваъда қилиб, 1.200.000 сўмдан 500.000 сўм кам берган6.

    Фирибгарликни ўзига касб қилиб олган К.М. Ўзбекистон Республикаси ЖК 168-моддаси 3-қисмининг “б” бандида назарда тутилган жиноятни содир этганликда айбдор деб топилгач унга нисбатан ойлик иш ҳақининг 20 (йигирма) фоизини давлат даромадига ушлаб қолган ҳолда 2 (икки) йил ахлоқ тузатиш ишлари жазоси тайинланди. Фирибгар ҳунарини ахлоқ тузатиш жараёнида давом эттирса ажабмас…

  • ТОШКЕНТДА БИР АСР ХИЗМАТ ҚИЛИШИ АЙТИЛГАН ЙЎЛ ЎТКАЗГИЧ 2 ЙИЛГА ЕТМАЙ ЎПИРИЛИБ ТУШДИ

    ТОШКЕНТДА БИР АСР ХИЗМАТ ҚИЛИШИ АЙТИЛГАН ЙЎЛ ЎТКАЗГИЧ 2 ЙИЛГА ЕТМАЙ ЎПИРИЛИБ ТУШДИ

    Темур Малик кўчаси ва Буюк Ипак йўли кўчаси чорраҳасида жойлашган йўл ўтказгичнинг бир қисми ўпирилиб тушди. Ушбу иншоот 2024 йил август ойида фойдаланишга топширилган бўлиб, унинг қурилишига 128,6 млрд сўм маблағ сарфланган эди.

    Маълумотларга кўра, йўл ўтказгичнинг хизмат муддати 100 йилга мўлжаллангани айтилган. Бироқ орадан қарийб икки йил ҳам ўтмасдан, иншоотнинг бир қисмида ўпирилиш содир бўлди. Ҳодиса жамоатчилик орасида кенг муҳокамаларга сабаб бўлмоқда.

    Элтузарга келган маълумотларга кўра, ҳодиса жойига Тошкент шаҳар ҳокими, мутасадди ташкилотлар раҳбарлари ҳамда мутахассислар етиб бориб, вазиятни ўрганишни бошлади. Ҳудудда хавфсизлик чоралари кучайтирилиб, транспорт ҳаракати вақтинча чекланди.

    Шаҳар ҳокимиятининг дастлабки изоҳига кўра, ҳодисага кучли ёғингарчилик сабаб бўлган бўлиши мумкин. Шу билан бирга, мутахассислар томонидан лойиҳа ҳужжатлари, қурилиш ишларининг сифати, шунингдек дренаж ва сув чиқариш тизимининг ҳолати атрофлича текширилмоқда.

    Текширув натижаларига кўра, воқеага аниқ нима сабаб бўлгани ва масъуллар ҳақида қўшимча маълумот берилиши кутилмоқда.

  • 20 ЯШАР СУКУНАТ КАНАЛИ ЭГАСИГА СУД ҲУКМИ

    20 ЯШАР СУКУНАТ КАНАЛИ ЭГАСИГА СУД ҲУКМИ

    2006 йили туғилган ва умр бўйи бекорчилик қилиб зериккан қизпошша диний радикаллик градуси ошиб, ўзини уммат онаси ролида кўра бошлади. У Афғонистондаги Умомахон ва гўёки Қирғизистонлик Ғуроба деган кимсалар таъсирига тушиб телеграмда диний ақидапарастлик руҳидидаги «Сукунат» каналини очди.

    Канал эгаси 2024 йил май ойидан буён турли экстримистик видео, аудио ва pdf материаллар тарқатиш билан шуғулланиб келган. Тарқатилган манбалар сирасида демоктратия тоғут ва куфур тузим деб номланади, шариат қиличини тутиш шартлиги ҳақида жанговар тарғиботлар аниқланди.

    Чиноз туман суди ҳаваскор уммат энасига 3 йил озодликни чеклаш жазосини қўллади. Энди уйда совчи кутади.

  • ТАЪЛИМ БОШҚАРМАЛАРИНИНГ ДАВЛАТ ХАРИДЛАРИ НЕГА ШАФФОФ ЭМАС?

    ТАЪЛИМ БОШҚАРМАЛАРИНИНГ ДАВЛАТ ХАРИДЛАРИ НЕГА ШАФФОФ ЭМАС?

    Қашқадарё вилоят мактабгача ва мактаб таълими бошқармаси ва “EXTREME PROFIT” МЧЖ ўртасида 17.12.2025 йилда 74100 дона қўл учун суюқ (антисептик) дезинфекция воситаси учун бюджетдан 1.111.500.000 сўм ўтказиб берилган.

    74 минг дона антисептик восита нархи миллиард сўмдан ошмоқда. Одатда бу каби йирик ҳаридларда товар нархи анча арзонлаштирилиши керак. Шартномадаги товар бошқарма тасарруфидаги мактаб ва боғчаларга етиб бордими ўзи? Бу ҳам бир очиқ савол.

    Давлат ҳаридларида маҳсулот нархини белгилашнинг муайян тартиби йўқ. Товарлар бозордаги реал нархидан анча қиммат баҳоланади. Шунингдек, товарлар тўлиқ етказиб берилдими — бу ҳам очиқ назорат қилинмайди.

    Масалан, Қашқадарё вилояти мактаб боғчалари антисептик маҳсулотни бошқармадан оладими ёки ота-оналар бунинг учун фонд пули йиғишадими?

    Давлат ҳаридлари ҳақида ҳисоботлар реал асос ва далиллар билан тақдим этилмас экан, коррупцияга қарши курашяпмиз деб кўкрагингизга урманг, муҳтарам мутасаддилар.

  • БЛОГЕР ҚАМОҚҚА ОЛИНДИ. АММО НЕГА АЙНАН ҲОЗИР?

    БЛОГЕР ҚАМОҚҚА ОЛИНДИ. АММО НЕГА АЙНАН ҲОЗИР?

    YouTube’даги Sirojiddin Media канали муаллифи Сирожиддин Одиловга нисбатан фирибгарлик ва пора бериш гумони билан жиноят иши қўзғатилиб, қамоқ эҳтиёт чораси қўлланди. Расмий баёнотда айтилишича, мурожаатчи 2024 йил августидаги воқеа юзасидан ҳуқуқни муҳофаза қилувчи органларга ариза берган.

    Аммо бу ерда жамоатчиликни ўйлантирадиган жиддий савол бор: нега икки йилга яқин вақт олдинги мавҳум ҳолат айнан бугун кўтарилмоқда? Нега бу иш ҳозир шошилинч тарзда оммага олиб чиқилди?

    Бу саволлар бежиз эмас. Чунки “Sirojiddin Media” сўнгги вақтларда кўпларнинг тинчини бузган, оғриқли мавзуларни кўтарган, ноҳақлик, тизимдаги муаммолар ва ёпиқ қолган масалаларни очиқ муҳокамага олиб чиққан платформалардан бири эди.

    Шу нуқтада масала фақат бир блогер тақдири эмас. Бу ерда гап сўз эркинлиги ҳақида кетмоқда. Агар танқид қилаётган, суриштирув олиб бораётган ёки ноқулай савол бераётган журналист ва блогерларга қарши эски, ноаниқ ёки баҳсли ишлар кетма-кет қўзғатилса, бу усиз ҳам тинкаси қуриётган медиамуҳитни ўласи қилиб калтаклашга тенг бўлади. Бундай ҳолат қамалмай қолган қолган тўртта қўтирга аниқ бир мессежни беради:
    “Қисиб юрмасанг, сенга ҳам навбат келади.”

    Бундай вазиятда жамоатчиликда қонунга эмас, балки танлаб ишлатиладиган босим механизмига шубҳа кучаяди. Қонун устувор бўлган жойда ҳар қандай айблов очиқ, шаффоф, далилларга асосланган ва шубҳаларни бартараф этадиган тарзда кўрилиши керак. Айниқса, гап жамоатчиликка таъсири катта бўлган блогер ёки журналист ҳақида кетаётганда, тергов жараёни ҳам, расмий изоҳлар ҳам мутлақо шаффоф бўлиши шарт.

    Журналист ёки блогер қонундан устун эмас, албатта. Лекин давлат ҳам танқидий овозларни ўчириш учун қонундан қурол сифатида фойдаланмаслиги керак. Агар айблов асосли бўлса, буни суд ҳал қилади. Аммо агар ишнинг ортида танқидий фаолият учун жазолаш, қўрқитиш ёки овозни ўчириш мақсади турган бўлса, бу фақат бир инсонга эмас, бутун жамиятнинг ахборот олиш ҳуқуқига қарши зарба бўлади.

    Бугун Сирожиддин Одиловга нисбатан бўлаётган воқеани навбатдаги “жиноят иши” деб бўлмайди. Бу иш биз сўз эркинлигини ҳақиқатан қадрлаймизми, журналист ва блогерларнинг хавфсиз ишлаши учун кафил бўла оламизми, деган саволга аниқ жавоб беради.

    Эркин журналистика бўлмаган жойда адолат ҳам сустлашади. Блогерлар ва журналистлар қўрқув остида яшайдиган муҳитда коррупция, манфаат тўқнашуви ва зулм янада чуқурлашади. Шунинг учун бугун бир блогерни ҳимоя қилиш масаласи, аслида, эртага ҳар бир фуқаронинг сўз айтиш ҳуқуқини ҳимоя қилиш демакдир.

    Сирожиддин Одилов иши қонун доирасида, очиқ ва холис кўриб чиқилиши шарт. Жамоатчилик эса бу каби ҳолатларга бефарқ қарамаслиги керак. Чунки бугун блогернинг овози ўчирилса, эртага жамиятнинг ўзи сукутга маҳкум бўлади. Матбуот майдони эса қўрқоқ, конформист ва маддоҳ журналисту блогерларга қолади.