Eltuzar

Blog

  • АҚШ ВА ИСРОИЛ БАНКЛАРИ ЭРОН НИШОНИДА

    АҚШ ВА ИСРОИЛ БАНКЛАРИ ЭРОН НИШОНИДА

    Эроннинг Ислом инқилоби қўриқчилари корпуси — Islamic Revolutionary Guard Corps (IRGC) — урушнинг 12 кунида АҚШ ва Исроил билан боғлиқ иқтисодий марказлар ва банкларга ҳужум қилиш билан таҳдид қилди.

    Khatam al-Anbiya Headquarters номли, Бирлашган Миллатлар Ташкилоти IRGCга тегишли деб таърифлаган гуруҳнинг матбуот котиби ўз баёнотида:

    “Душман бизнинг қўлимизни очиқ қолдирди — энди биз минтақадаги АҚШ ва сионистик режимга тегишли иқтисодий марказлар ва банкларни нишонга олишимиз мумкин.”
    деди.

    Демак, АҚШ ва Исроилнинг минтақадаги банк ва молиявий тузилмалари Эрон нишонига айланади.

  • БЛОГЕР СИРОЖИДДИН ОДИЛОВ ҚАМОҚҚА ОЛИНДИ: ҲИМОЯ ҲУҚУҚИ ЧЕКЛАНДИМИ?

    БЛОГЕР СИРОЖИДДИН ОДИЛОВ ҚАМОҚҚА ОЛИНДИ: ҲИМОЯ ҲУҚУҚИ ЧЕКЛАНДИМИ?

    Самарқанд вилояти Пастдарғом тумани суди бир неча соат аввал Ўзбекистон Республикаси Жиноят кодексининг 165-моддаси — товламачилик билан гумонланаётган блогер Сирожиддин Одиловга нисбатан қамоқ эҳтиёт чорасини қўллаш ҳақида қарор чиқарди.

    Sirojiddin Odilov ижтимоий тармоқларда кенг танилган эди. Фаолияти давомида кўплаб мурожаатларни жамоатчиликка олиб чиққан, муаммоларни кўтарган, одамларга ёрдам берган блогер сифатида танилган.

    Маълум бўлишича, эҳтиёт чораси муҳокамасига пойтахтдан етиб келган икки нафар адвокат ордери бўлишига қарамай, суд жараёнига киритилмаган. Уларнинг ўрнига давлат томонидан тайинланган адвокат иштирок этган.

  • СУВ ТАЬМИНОТИ ХОДИМИНИ КАЛТАКЛАГАН ФУҚАРОГА ЖИНОЯТ ИШИ ҚЎЗҒАТИЛДИ

    СУВ ТАЬМИНОТИ ХОДИМИНИ КАЛТАКЛАГАН ФУҚАРОГА ЖИНОЯТ ИШИ ҚЎЗҒАТИЛДИ

    Фарғона вилоятида сув таъминоти ходимини калтаклаган фуқарога нисбатан жиноят иши қўзғатилди, дейди Бош прокуратура матбуот хизмати.

    Маълум бўлишича, ҳодиса 9-март куни содир бўлган. Сув таъминоти ходими Сочтепа кўчасидаги хонадонлардан бирига борган. Текширув давомида инспектор рўйхатдан ўтказилмаган ҳисоблагич мавжудлигини аниқлаган. Ҳолат юзасидан тегишли ҳужжатлар расмийлаштирилиб, жарима қўлланиши маълум қилингач, хонадонда яшовчи фуқаро Фазлиддин Пардаев жанжал чиқарган.

    Жанжал пайтида Пардаев воқеа жойида бўлган ёғоч билан инспекторнинг бошига уриб жароҳат етказган. Мазкур ҳолат юзасидан Жиноят кодексининг 219-моддаси 2-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Гумонланувчи қўлга олинган, тергов ҳаракатлари олиб борилмоқда.

    Аввалроқ тармоқларда можаро давомида инспекторнинг хизмат автомобили ҳам шикастлангани хабар қилинганди. Жабрланган ходимга зудлик билан тиббий ёрдам кўрсатилган, шунингдек, ҳолат юзасидан туман ички ишлар бўлимига хабар берилган.

  • МАСТ ОТА ОЛТИ ОЙЛИК ҚИЗИНИ ТЕЛЕФОН БИЛАН УРИБ ЎЛДИРДИ

    МАСТ ОТА ОЛТИ ОЙЛИК ҚИЗИНИ ТЕЛЕФОН БИЛАН УРИБ ЎЛДИРДИ

    Вақтинчалик ишсиз Ш.Н қўлига бир-икки сўм тушиб, шу пулни “ювмасам бўлмас” дедию, турмуш ўртоғи ва фарзандлари билан кафеда овқатланишга борди.

    Овқатнинг ўзи силлиқ кетмайди. Ёнига томоқни қиздирадиган яна нимадир керак, дея спиртли ичимликдан ҳам яхшигина урволди.

    Уйга қайтишда эса рулга ўтирмоқчи бўлганини кўрган хотини унга маст ҳолда машина ҳайдашига рухсат бермади. Бундан жаҳли чиққан эр ўта маст ҳолатда қўлидаги ўзига тегишли бўлган “Redmi” русумли телефон аппаратини отиб юборди. Ва ушбу телефон хотинининг қўлида бўлган 6 ойлик қизчасига келиб тегди. Қизалоқ кўрсатилган тиббий муолажаларга қарамасдан шифохонада вафот этди.

    “Меҳрибон” ота Ш.Н Ўзбекистон Республикаси ЖКнинг 102-моддаси 1-қисмида назарда тутилган жиноятни содир этганликда айбдор деб топилди.

    Унга нисбатан 2 йил муддатга озодликни чеклаш жазоси тайинланди. Сизнинг-ча, бу адолатли қарорми?

  • МОЛБОҚАРНИ ГЎРГА ТИҚҚАН ҲАЙДОВЧИМИ Ё ҚОРАМОЛ?

    МОЛБОҚАРНИ ГЎРГА ТИҚҚАН ҲАЙДОВЧИМИ Ё ҚОРАМОЛ?

    МОЛБОҚАРНИ ГЎРГА ТИҚҚАН ҲАЙДОВЧИМИ Ё ҚОРАМОЛ?

    Бағдодлик Б.Ҳ бошқарувидаги давлат белгили “Nexia”сига уланган тиркамаси билан кетаётганди.

    Бу пайтда эса йўлнинг унга нисбатан ўнг томон четида Х.О қорамол етаклаб келаётганди. Воқеа гўзал якун топиши мумкин эди. Агар бахтсиз ҳодиса юз бермаганида.

    Х.О.ни қорамол автомобиль қатнов қисмига тортиб, қатнов йўлига чиқариб юбориши натижасида у автомашина орқа тиркамаси ўнг бурчагига урилиб, тан жароҳати олади.

    Ҳайдовчи эса жабрланувчини хавфли аҳволга солганига қарамай, унга ёрдам бериш ўрнига ҳодиса жойидан қочиб кетади. Натижада Х.О.а нисбатан кўрсатилган тиббий ёрдамга қарамасдан у шифохонада вафот этди.

    Қочқоқ ҳайдовчи Ўзбекистон Республикаси Жиноят кодекси 117-моддасининг 2-қисмида назарда тутилган жиноятни содир этганликда айбдор деб топилди.

    Унга нисбатан иш ҳақининг йигирма фоизи миқдорини давлат даромади ҳисобига ушлаб қолган ҳолда, 2 йил муддатга ахлоқ тузатиш ишлари жазоси тайинланди.

    Молбоқар гўрда, қорамол оғилхонада, ҳайдовчи эса иссиққина уйида…

  • XXI АСРДА ҚУЛЛИК: ЯКУТИЯДА ОТА ВА ЎҒИЛ ОДАМЛАРНИ СИГИРХОНАДА ЗАНЖИРДА УШЛАБ ТУРГАН

    XXI АСРДА ҚУЛЛИК: ЯКУТИЯДА ОТА ВА ЎҒИЛ ОДАМЛАРНИ СИГИРХОНАДА ЗАНЖИРДА УШЛАБ ТУРГАН

    Россия ОАВлари ва суд ҳукмига кўра, Якутиянинг Нюрба туманида бир тадбиркор ва унинг отаси икки нафар эркакни мажбуран ушлаб туриб, фермада текинга ишлатган.

    Жабрланувчилар гўнг тозалашган, чорвага қарашган ва оғир меҳнат ишларини бажаришган.

    Улар совуқ, иситилмайдиган биноларда яшашган ва мунтазам равишда калтакланган.

    Эркаклардан бири сигирхонадаги боғлаш жойига занжир билан боғлаб қўйилган.

    Бу жиноят ҳақида ишчилардан бири қочиб кетганидан кейин маълум бўлган.

    Нюрба туман суди отани умумий тартибдаги колонияга 3 йилга, ўғлини эса 3 йил 2 ойга ҳукм қилди.

  • АҚШДА РЕКОРД ДАРАЖАДАГИ ИСЛОМОФОБИЯ ШИКОЯТЛАРИ ҚАЙД ЭТИЛДИ

    АҚШДА РЕКОРД ДАРАЖАДАГИ ИСЛОМОФОБИЯ ШИКОЯТЛАРИ ҚАЙД ЭТИЛДИ

    CAIR инсон ҳуқуқлари ташкилотининг маълумотларига кўра, 2025 йилда АҚШ бўйлаб мусулмонлар 8683 маротиба камситилгани қайд этилган – бу 1996 йилда статистика юритила бошланганидан бери энг юқори кўрсаткич.

    Шикоятларнинг аксари иш жойидаги камситиш, иммиграция тартиблари, нафратга асосланган ҳодисалар ва саёҳат чекловлари, жумладан, қўшимча текширувлар ва ҳукуматнинг кузатув рўйхатларига киритиш билан боғлиқ бўлган.

    Инсон ҳуқуқлари фаоллари вазиятни иммиграция сиёсатининг кучайиши ва Фаластин тарафдорлари норозиликларига босим ўтказиш билан боғлашади.

    CAIR фикрича, сўнгги бир йил ичидаги риторика мусулмонларга нисбатан шубҳа муҳитини кучайтирди.

  • АНДИЖОННИНГ ЯНГИ БОЗОРИ АТРОФИДАГИ ЙЎЛЛАРНИ КИМ ЁПИБ ҚЎЙДИ

    АНДИЖОННИНГ ЯНГИ БОЗОРИ АТРОФИДАГИ ЙЎЛЛАРНИ КИМ ЁПИБ ҚЎЙДИ

    Андижон шаҳри Мангулик кўчасида яшовчи фуқаролар Элтузарга мурожаат йўллаб, Янги бозор атрофидаги йўллар билан боғлиқ муаммога эътибор қаратишни сўрамоқда.

    Мурожаатда таъкидланишича, бир йилдан ортиқ вақт давомида Дилшер исмли шахс ва унинг 5–6 нафар шериклари Янги бозор атрофидаги бир-бирига туташ йўлларни ёпиб, улардан пуллик автотураргоҳ сифатида фойдаланиб келмоқда. Бу эса маҳалла аҳолиси ва ҳайдовчилар учун қатор ноқулайликлар келтириб чиқараётгани айтилган.

    Фуқароларнинг билдиришича, мазкур йўллар аввалдан маҳалла аҳолиси томонидан умумий фойдаланиб келинган ҳудуд ҳисобланади. Шу сабабли улар ушбу йўлларни очиб, аҳоли фойдаланишига қайтарилишини сўрамоқда.

    Мурожаат муаллифи ўз сўзларида у мазкур маҳаллада 1946 йилдан буён истиқомат қилиб келаётганини ва бундай ҳолатни аввал кузатмаганини таъкидлаган.

    Андижон вилояти ҳоким Шуҳрат Абдураҳмоновдан муносабат кутамиз.

  • ЛУКАШЕНКО ТУҒИЛИШ ДАРАЖАСИ ПАСТЛИГИДАН ШИКОЯТ ҚИЛИБ, ЎЗБЕКИСТОНДАН ИШЧИЛАРНИ ЧАҚИРДИ

    ЛУКАШЕНКО ТУҒИЛИШ ДАРАЖАСИ ПАСТЛИГИДАН ШИКОЯТ ҚИЛИБ, ЎЗБЕКИСТОНДАН ИШЧИЛАРНИ ЧАҚИРДИ

    Ўзбекистон элчиси билан учрашувда Лукашенко Беларусь ўзбек меҳнат муҳожирларини, айниқса оилали меҳнат муҳожирларини мамнуният билан қабул қилишини айтди.

    Унинг сўзларига кўра, мамлакатда аҳоли сони Ўзбекистондагидек тез ўсмаяпти, шунинг учун Минск яшаш ва ишлашни истаганларни қабул қилишга тайёр.

    У, шунингдек, келганларга белоруслар билан “тенг ҳуқуқли” тарзда болалар боғчалари, мактаблар ва таълимдан фойдаланиш имконияти берилишини ваъда қилди.

    Беларусь ҳукумати анчадан бери ортиб бораётган кадрлар танқислигини муҳожирлар ҳисобига қоплашга уриниб келмоқда.

    Бундан аввал Лукашенко Покистондан ўн минглаб ишчиларни жалб қилиш ҳақида гапирган эди, аммо мамлакатга жуда кам сонда одам келган.

  • БУХОРО ПОЛИКЛИНИКАСИДА ТОМЧИ УКОЛ ҚИЛИШ НАРХИ ҚАНЧА?

    Бухоро шаҳар 5 кичик ноҳия аҳолиси Бухоро шаҳар тиббиёт бирлашмасига қарашли 5 оилавий поликлиникаси кундузги бўлим шифокори Мажидова Заринадан норози.

    Шикоятда таъкидланишича, Мажидова Зарина ҳар бир улаган томчи уколи, қилган муолажалари учун аҳолидан пул олиб таъмагирлик қилиб келади. Баъзида келтирилган қиммат укол ампулаларни ҳамасини ҳам системага узатмай ўзининг манфаатлари йўлида ишлатиб юбориши ҳам қайд этилмоқда.

    Бу аҳоли шикоятига унча ўхшамайди аслида. Ходимлардан бирортаси ёзган кляузани эслатяпти. Лекин айбловлар жиддий бўлгани сабаб Элтуз масалани оммага тақдим этмоқда:

    «Мажидова Зарина бош шифокор ҳам менга индай олмайди ва вилоят ССБда танкаларим бор дея таҳдид қилади. У кундузги бўлимни ўзининг хусусий клиникасидек қилиб олган. Билим даражасику жуда паст. Минг афсуски назарий билимлари мутлақо бугунги кун талабларига ҳам жавоб бермайди. Мажидова Заринани билим даражасини текшириш учун Аргос тестидан ва клиник аттестациядан қайта ўтказиб текшириш зарур, зеро халқ соғлиги фақат пулга ихлос қиладиган чала шифокор қўлида қолмаслиги зарур!» – дейди унинг ҳамкасблари.

    Шикоят мазмунида жон борми ёки гадонинг душмани гадо бўладими? Буни масъуллар текшириб аниқлик киритишини сўраймиз.