Eltuzar

Category: Ўзбекистон

  • ФАРҒОНА ДАВЛАТ УНИВЕРСИТЕТИДА ИЛМИЙ ИШЛАР САВДОСИ ВА ПЛАГИАТ

    ФАРҒОНА ДАВЛАТ УНИВЕРСИТЕТИДА ИЛМИЙ ИШЛАР САВДОСИ ВА ПЛАГИАТ

    Фарғона давлат университети фаолияти юзасидан Элтузарга келиб тушган мурожаатда олийгоҳда илмий ишлар тайёрлаш ва ҳимоя жараёнлари билан боғлиқ жиддий қоидабузарликлар мавжудлиги ҳақида иддаолар билдирилган. Мурожаат муаллифига кўра, университетда айрим илмий ишлар очиқдан-очиқ “сотилаётган”, уларнинг катта қисми эса плагиат, яъни кўчирмачилик асосида тайёрланаётган бўлиши мумкин.

    Мурожаатда таъкидланишича, айрим ўқитувчилар ва тадқиқотчилар бу ҳолатлардан норози бўлса-да, масала очиқ кўтарилмаяпти. Шунингдек, университет раҳбарияти томонидан илмий салоҳиятни ошириш бўйича босим кучайгани, бироқ барча ходимлар учун тенг имконият ва шароит яратилмаётгани айтилган.

    Мурожаат муаллифи айрим шахслар учун илмий кенгаш ва ҳимоя жараёнлари енгиллаштирилгани, бошқа тадқиқотчилар учун эса сунъий тўсиқлар ва кутиш ҳолатлари юзага келаётганини даъво қилган. Унинг ёзишича, ҳақиқий илмий ишлар ойлаб кўриб чиқилмасдан қолиб кетаётган бир пайтда, сохта ва шубҳали диссертациялар тезлаштирилган тарзда ўтказилмоқда.

    Иддаоларда яна шу ҳам қайд этилганки, айрим ҳужжатлар, жумладан кафедра муҳокамаси баённомалари, далолатномалар ва жорий этишга оид материаллар расмий тартибда эмас, балки бир жойда тайёрланаётган бўлиши мумкин. Мурожаатда бу жараёнлар “Фалсафа” кафедраси мисолида алоҳида тилга олинган.

    Шу билан бирга, муаллиф коррупцияга қарши курашишга масъул тузилмалар ва назорат органлари ҳам бундай мурожаатларга етарлича эътибор қаратмаётганини билдирган. Унинг фикрича, бу ҳолат университетда сохта диссертациялар ва ноқонуний илмий амалиётлар илдиз отишига шароит яратмоқда.

    Мурожаатда келтирилган барча иддаолар расман тасдиқланмаган. Шу боис, мазкур ҳолатлар юзасидан ваколатли идоралар, Олий аттестация комиссияси ва тегишли назорат органлари томонидан холис ва шаффоф текширув ўтказилиши, айбдорлар аниқланса, қонуний чора кўрилиши жамоатчилик учун муҳим аҳамият касб этади.

  • АНДИЖОНДАГИ 48-МАКТАБДА БИТИРУВЧИЛАР ЧЎНТАГИГА ҚЎЛ СОЛИНЯПТИМИ?

    АНДИЖОНДАГИ 48-МАКТАБДА БИТИРУВЧИЛАР ЧЎНТАГИГА ҚЎЛ СОЛИНЯПТИМИ?

    (Бу хат муаллифи шахси сир сақланишини сўрайди)

    Андижон шаҳридаги 48-мактабнинг битирувчи синфларида ўқиётган ўқувчилардан турли важлар билан пул йиғилаётгани ҳақида мурожаат келиб тушди.

    Мурожаат муаллифининг билдиришича, унинг эгизак икки синглиси ҳам айнан шу мактабда битирувчи ҳисобланади.

    Уларнинг айтишича, битирув тадбири учун саҳна безакларига ҳар бир ўқувчидан 100 минг сўм, якуний олтита имтиҳонга доир “расмиятчилик ишлари” ва ўқитувчиларнинг тушлиги учун 200 минг сўм, битирув лентаси учун эса мажбурий тарзда 50 минг сўм талаб қилинмоқда.

    Бундан ташқари, мактаб таъмири учун яна 60 минг сўмдан пул йиғиш айтилган.

    Энг ачинарлиси, бу пулларни топширмаган ўқувчилар синф раҳбарлари томонидан бошқалар олдида шарманда қилинаётгани ҳақида иддао бор.

    Ҳолатнинг кўламига эътибор қаратсак, бу йил мазкур мактабни жами 9 та синф битиради. Айрим синфларда 39-40 нафаргача ўқувчи бор.

    Ҳатто ҳар бир синфда ўртача 30 нафардан ўқувчи бор деб ҳисоблаганда ҳам, фақат “имтиҳон расмиятчилиги” ва ўқитувчилар тушлиги учун йиғилаётган 200 минг сўмнинг ўзи 54 миллион сўмга етади. Саҳна безаклари учун йиғилаётган 100 минг сўм эса яна 27 миллион сўмни ташкил қилади.

    Мурожаатда таъкидланишича, мактаб таъмири учун пул йиғиш ҳам тушунарсиз кўринади. Чунки ушбу мактаб ўтган йили “Очиқ бюджет” лойиҳасида ғолиб бўлиб, битта янги бино қурилган, эски бинолари эса капитал таъмирланган.

    Шундай экан, савол туғилади: давлат мактабида битирувчи ўқувчилардан нега бунча миқдорда пул йиғиляпти? “Расмиятчилик” деган тушунча ортида нима яширинган? Давлатдан маош оладиган ўқитувчиларнинг тушлиги нима учун ўқувчилар ҳисобига тушмоқда?

    Мутасадди ташкилотлардан ушбу ҳолат юзасидан холис ва қонуний текширув ўтказиш, айбдорларга чора кўриш ҳамда мактабларда мажбурий пул йиғиш амалиётига чек қўйиш сўралади.

  • БУХОРО ҲОКИМЛИГИ АРХИВАРУСНИ СИҚУВГА ОЛДИ

    БУХОРО ҲОКИМЛИГИ АРХИВАРУСНИ СИҚУВГА ОЛДИ

    Бухоро вилояти ҳокимлигида архивариус лавозимида ишлаб келаётган Равшанова Мафтуна Бахшиллоевна ноҳақ ишдан бўшатилгач, ўз ҳуқуқларини ҳимоя қилиб ишга қайтди. Бироқ унга нисбатан маъмурий босим ортмоқда.

    2025 йил 22 декабрь куни ходимга штат қисқартирилиши ҳақида огоҳлантириш берилган. Қизиғи шундаки, Вазирлар Маҳкамасининг 2025 йил 24 июлдаги 465-сон қарорида архивариус штати норматив бўйича кўрсатилган. Яъни ҳужжатларга кўра архивчи бўлиши керак. Лекин амалда бу лавозим “кераксиз” деб топилди.

    Равшанова судга мурожаат қилишини айтганидан кейин эса вазият янада қизиқ тус олди. Уни 2026 йил 24 февраль куни архивариус лавозимига қайта ишга қабул қилиш ҳақида буйруқ чиқарилди.

    Буйруқ чиққанидан кейинги воқеалар эса бюрократик сериални эслатади.

    Умумий бўлимда штатлари қисқартирилган яна уч нафар ходим бор эди. Уларга ишга келмаслик “тавсия қилинди”. Барча иш Равшановага юкланди. Устига-устак, иш вақти кечки соат 23:00 гача эканлиги таъкидланди.

    Яъни бир ходим — тўрт штат ишчининг вазифаларини бажариши керак.

    2026 йил 25 февраль куни бўлим мудири Собир Абдуллаев ходимга босим ўтказиб, ҳақорат қилди ва ҳатто уни хонадан туртиб чиқарди. Равшанова бу ҳақда ҳокимга айтишини айтганида эса “бор, айтгин” деган жавоб олган.

    2026 йил 9 март куни ишга чиққан ходим 12 март куни яна бир “сюрприз”га дуч келди. Кадрлар инспектори уни чақириб, янги қисқартириш бўйича огоҳлантириш ва ишдан бўшатиш ҳақидаги буйруққа қўл қўйишни талаб қилди.

    Ҳали ишга қабул қилиш буйруғи чиққанидан 10 кун ҳам ўтмаган.

    Қисқартириш учун асос сифатида ПФ-228 кўрсатилди. Аммо ҳокимликнинг идоравий архив фонди сақланиб турибди. Ҳужжатлар ҳажми эса жуда катта — 55 минг сақлов бирлиги бор.

    Вазирлар Маҳкамасининг нормативига кўра эса 6000 та ҳужжатга бир архивчи бўлиши шарт. Яъни аслида архивчи керак, аммо амалда архивчи “ортиқча”.

    Бундан ҳам қизиғи — архив ҳужжатлари ҳокимлик биносида жой йўқлиги сабабли хизмат уйининг бир хонасида сақланмоқда. Калит эса архивчида эмас, кадрлар бўлимида. Ҳужжатлар архивчининг иштирокисиз олиб чиқилаётгани ҳам айтилмоқда.

    Шу ҳолатда савол туғилади: архив учун жавобгар ким?

  • БУХОРОДАГИ СПОРТ МАРКАЗИДАГИ МУАММОЛАРГА КИМ ЖАВОБ БЕРАДИ?

    БУХОРОДАГИ СПОРТ МАРКАЗИДАГИ МУАММОЛАРГА КИМ ЖАВОБ БЕРАДИ?

    Бухоро олимпия ва паралимпия спорт турларига тайёрлаш маркази атрофида янграётган иддаолар одамни ўйлантириб қўяди. Элтузарга келган мурожаатда айтилишича, марказ директори Х.М. Хусенов ва спорт ишлари бўйича директор ўринбосари Ф.Р. Файзуллоев фаолияти юзасидан коррупцияга оид оғир шикоятлар бор.

    Иддаоларга кўра, спортчиларни марказга ўқишга қабул қилиш жараёнида пул талаб қилинади. Ҳатто бу маблағлар АҚШ долларида сўралаётгани ҳақида гап-сўзлар бор.

    Мурожаатларда яна бир жиддий ҳолат тилга олинади: тренерлар ва спортчиларнинг хизмат сафари учун ажратилган маблағларидан эркаклардан 15 фоиз, аёллардан 10 фоиз миқдорида ушлаб қолинаётгани айтилмоқда.

    Мурожаатга кўра, мусобақаларда чемпион бўлиб, марказга ўқиш учун ҳужжат топширган айрим ёшлар ҳам талаб қилинган пулни бера олмагани учун четда қолдирилган.

    Яна бир иддаога кўра, текширув келгунча кўргазмали тартиб ўрнатилади, аммо назорат сусайиши билан яна эски муҳит қайтиб келади. Ходимлар “овоз чиқарсак, ўзимизга ёпишиб олишади”, деган хавотир билан яшайди.

    Хўш, бундай бедодликдан Спорт вазирлигининг хабари борми? Спорт вазири ҳадеб қўлида микрофон олиб қўшиқ айтавермасдан ҳолатга эътибор қаратса фойдадан холи бўлмасди. Йўқ, агар хабари бўлса, нега чора кўрмаяпти?

  • ERIELL ВА ENTER ENGINEERING: ФОЙДА – ХУСУСИЙ, МУАММО-ДАВЛАТНИКИ

    ERIELL ВА ENTER ENGINEERING: ФОЙДА – ХУСУСИЙ, МУАММО-ДАВЛАТНИКИ

    Ўзбекистонда хусусийлаштириш ҳақида гап кетганда одатда “самарали хусусий мулкдор”, “инвестиция”, “ишончли бошқарув” сингари  чиройли иборалар ишлатилади. Лекин Enter Engineering, Eriell ва Saneg атрофидаги охирги воқеалар бу моделнинг бошқа томонини ҳам кўрсатмоқда.

    Расмий маълумотларга кўра, ушбу гуруҳга тегишли ширкатларда 38 минг ходимнинг 130 миллион доллардан ортиқ маошидан қарздорлик йиғилиб қолган.  Расмий изоҳга кўра, шу қарзни ёпиш учун ҳукумат катта активларни сотиш режасини тасдиқлаган.

    Сотувга чиқарилиши кутилаётган объектларга қаранг:

    -Самарқанд аэропорти

    -Silk Road Samarkand меҳмонхоналари

    -Фарғона нефтьни қайта ишлаш заводи

    -тиббиёт маркази

    -офис бинолари ва бошқа активлар

    Кечагина “Янги Ўзбекистон туризм маркази”, “инвестиция рамзи”, “миллий ривожланиш лойиҳаси” деб кўрсатилган объектлар бугун, расмий важларга ишониладиган бўлса,  маошлардан  қарздорликни ёпиш учун сотувга чиқарилмоқда.

    ФОЗИЛОВ ИМПЕРИЯСИ

    Бу ерда асосий фигура – 51 яшар Бахтиёр Фозилов.

    Унинг бизнес тармоғи энергетика, саноат қурилиши ва нефть соҳасидаги энг йирик контрактларни ўз ичига олади.

    Eriell – нефть-газ бурғулаш

    Enter Engeneering – кўп миллиардлик саноат қурилишлари

    Saneg – нефть ишлаб чиқариш ва қайта ишлаш.

    Бу компанияларга кейинги йилларда Ўзбекистондаги энг йирик давлат лойиҳалари берилган.

    Булар:

    Газ конлари.

    Металлургия объектлари.

    Нефть заводлари.

    Аэропортлар.

    Туризм мажмуалари.

    Қисқаси, иқтисодиётнинг ярми деярли бир бизнес гуруҳ қўлида жам бўлган эди.

    Айни пайтда бу империя фақат маҳаллий ресурслар билан қурилган эмас.

    Eriell ривожланишида Газпромбанк каби Россия молиявий институтлари иштирок этгани маълум. Бу банк Кремл ва шахсан Путинга яқин тузилмалардан бири ҳисобланади.

    Шу маънода, Eriell, бу – шунчаки маҳаллий хусусий бизнес эмас. Бу-Россия капитали, офшор тармоқлар ва давлат контрактларининг омухтаси ва маълум сиёсий ва саноат-молия гуруҳларининг манфаатлари кесишган нуқта.

    Ўзбекистонда сўнгги йилларда иқтисодни бошқаришнинг янги, ўзига хос модели шаклланди.

    Яъни давлат катта лойиҳаларни бир нечта йирик хусусий гуруҳга топширади.

    Мантиқ оддий:

    катта бизнес – тез қурилиш – катта инвестиция.

    Аммо амалда бошқача сценарий ишлаяпти.

    Активлар бир қўлда жамланади.

    Рақобат йўқолади.

    Молиявий хавф катталашади.

    Ҳозир айнан шу нарсани кўряпмиз.

    АКТИВЛАР КАРУСЕЛИ

    Eriell нинг банкротлиги мисолида юзага чиқаётган схема мана бундай:

    Давлатнинг йирик активлари танланган хусусийлар қўлларга берилади;

    Улар “миллий чемпион”га айлантирилади;

    Қарз ва бошқарув муаммоси юзага келади;

    Активлар яна сотилади;

    Карусел айланишда давом этади.

    38 минг одам ойликсиз қолгани, бу – шунчаки корпоратив муаммо эмас.

    Бу- савол:

    Ўзбекистонда хусусийлаштириш ҳақиқатан бозор ислоҳотими?

    Ёки активларнинг элита ичидаги навбатдаги қайта тақсимотими?

    Чунки амалда формула жуда таниш:

    Фойда хусусийлашади

    Муаммо эса миллийлашади (давлат муаммосига айланади)

    Ва бу жараён ҳамон “ислоҳот”деб аталади…

  • ҚЎШНИНИНГ МОЛЛАРИНИ ЎҒИРЛАГАНЛАР УШЛАНДИ

    ҚЎШНИНИНГ МОЛЛАРИНИ ЎҒИРЛАГАНЛАР УШЛАНДИ

    Қашқадарёлик бир гала бекорчилар муштипар аёлнинг уйига ўғриликка тушишни режа қилишди. А.Ю илгари ўғрилик содир этгани учун жазо муддати ўтаб келаётганига қарамай, яна хумори тутди.

    У қишлоқдоши Р.А билан олдиндан ўзаро тил бириктириб, тунги соат 01:30 ларда ўзлари билан бир қишлоқда яшовчи Ш.Ининг ҳовлисидан бозор баҳоси 1.500.000 сўм бўлган 3 бош майда шохли чорва молларини ўғирлашди. Ва бу жинояттдан хабардор бўлган бошқа бир ҳамқишлоғи Б.Жга  чорва молларини 3.000.000 сўмга пуллаб юборишди. Бизнес!

    А.Ю Ўзбекистон Республикаси ЖК 169-моддаси 3-қисмининг “а” бандида назарда тутилган жиноятни содир қилганликда айбли деб топилиб, 3 (уч) йил 6 (олти) ой муддатга озодликдан маҳрум қилинди. Шуниггдек, жазо қаттиқ тартибли колонияларда ўтилиши кўзда тутилади.

    Яна бир жиноятчи Р.А Ўзбекистон Республикаси ЖК 169-моддаси 2-қисмининг “в,г” бандларида назарда тутилган жиноятни содир қилганликда айбли деб топилди. Ҳамда унга нисбатан иш ҳақининг 20 фоизини давлат даромади ҳисобига ушлаб қолган ҳолда 2 (икки) йил муддатга ахлоқ тузатиш ишлари жазоси тайинланди.

    Молларни сотиб олган Б.Ж эса  Ўзбекистон Республикаси ЖК 171-моддасининг 1-қисмида назарда тутилган жиноятни содир қилганликда айбли деб топилди. Ва иш ҳақининг 20 фоизини давлат даромади ҳисобига ушлаб қолган ҳолда 1 (бир) йил муддатга ахлоқ тузатиш ишлари жазоси тайинланди.

  • ОТАСИНИ ЎЛДИРГАН ФАРЗАНД. КИМ АЙБДОР?

    ОТАСИНИ ЎЛДИРГАН ФАРЗАНД. КИМ АЙБДОР?

    Отасининг спиртли ичимлик ичиб, тинимсиз жанжал қилишидан безор бўлган фарзанд навбатдаги жанжалда онасининг ёнини олишга ҳаракат қилди. Қўлидаги таёқ билан хотинига таҳдид қилаётган “ЭР”нинг таёғини тортиб олган унинг вояга етмаган фарзанди ушбу таёқ билан отасининг бошига бир марта “пақ” этиб урган. Бунинг оқибатида эса зўравон эр-ота ўлиб қолди. Ўзи бир калтак ейишлик жонинг бор экан, нима қилардинг бўкиб ичиб дейдиган одам йўқ.

    Суд залида фарзанд онасини ҳимоя қилмоқчи бўлганини, отасига қасддан шикаст етказишни кўзламагани ва бўлган уриш-жанжаллар унинг руҳиятини синдирганини айтиб, енгиллик сўради.

    Вояга етмаган фуқаро Ўзбекистон Республикаси ЖКнинг 106-моддасида назарда тутилган жиноятни содир этган деб топилди. Унга нисбатан 2 йил озодликни чеклаш жазоси тайинланди. Ашёвий далил – бир дона таёқ  эса йўқ қилинди. Ота гўрда, ўғил уй қамағида.

  • ҚОРАКЎЛ ИЖТИМОИЙ ҲИМОЯ БЎЛИМИ НОГИРОНЛАР ПУЛИНИ “ТУЯ” ҚИЛИШДАН УЯЛМАЙДИМИ?

    ҚОРАКЎЛ ИЖТИМОИЙ ҲИМОЯ БЎЛИМИ НОГИРОНЛАР ПУЛИНИ “ТУЯ” ҚИЛИШДАН УЯЛМАЙДИМИ?

    Бухоро вилояти Қоракўл тумани ижтимоий ҳимоя бўлимида коррупция очиқчасига кучайиб кетган. Президентимиз томонидан ўзгалар парваришига муҳтож 1-гуруҳ ногиронлари  ҳолидан хабар олиб, уларга қараб туриш учун пуллик хизмат ташкил этилганди.

    Ушбу туман ижтимоий ҳимоя бўлими ногиронларга қараб туришга бириктирилган ҳар бир кишидан сертификат учун 200 000 сўмдан олишди.

    Ногиронларга қаровчиларга ҳар ой давлат томонидан 700 000 сўм деб тўланиши белгиланган бўлишига қарамай, 450 000 сўмини ушлаб қолишади.

    Юртбошимиз томонидан рўза ойи муносабати билан ногиронларга берилиши керак булган 1 000 000 сўм ҳам эгаларига етиб келмаяпти. 1140 ишонч телефонига мурожаат қилдим.

    Бироқ улар мендан ариза қабил қилишмади. Бунинг ўрнига 712020600 рақамига йўналтиришди.

    Берилган рақам билан боғланиб, муаммони тушунтириб, текширув ўтказишларини сўрасам, телефонни ўчириб қўйишди.

    Менинг турмуш ўртоғим ҳам 1-гуруҳ ногирони. Биз каби адолат излаётганлар кўп.

    Аммо дардимизни эшитадиган бирон ташкилот йўқ. Ногиронларниг устидан кулиш ва уларнинг ҳақини ейиш қайси меъзонга тўғри келади?

  • ДАВЛАТ ҲИСОБИДАН ТОП УНИВЕРСИТЕТЛАРДА ЎЙНАБ КЕЛАЁТГАН МУЛОЗИМЛАР ИҚТИСОДГА ҚАНДАЙ ФОЙДА КЕЛТИРАДИ?

    ДАВЛАТ ҲИСОБИДАН ТОП УНИВЕРСИТЕТЛАРДА ЎЙНАБ КЕЛАЁТГАН МУЛОЗИМЛАР ИҚТИСОДГА ҚАНДАЙ ФОЙДА КЕЛТИРАДИ?

    Ёшлар ишлари агентлиги раҳбари Алишер Саъдуллаев АҚШнинг Stanford университети қисқа курсларида ўқиб, буни меинстрим рекламага айлантиргани сир эмас.

    Саъдуллаев ижтимоий тармоқлардаги саҳифаларда бу ўқишини фавқулодда қаҳрамонлик, жуда машаққатли уринишлар натижаси каби тақдим этади. Хуллас, ўз шахсиятини шу зайлда эпик реклама қилиш урфга кирди.

    Энди яна бир АҚШнинг нуфузли ва жуда қиммат Mid-Career Master in Public дастурига Дилноза Каттахонова кетмоқда. У бу ҳақида ўз саҳифасида эълон қилди. Каттахонованинг ўқиш ҳаражатлари Ўзбекистон бюджетидан қопланади.

    Хўш, солиқ тўловчилар бундай курс учун пул тўлаши тўғрими? Ахир амалдаги кўплаб давлат амалдорларининг ойлик маоши бундай элит университетларда ўқиш харажатларини қоплашга етарли эмаслиги ҳаммага аёнку?

    Ушбу дастурда ўқиш, академик йиғимлар ва яшаш харажатлари билан бирга, тахминан 100 минг доллар атрофига бориши мумкин.

    Албатта, айримлар бундай таълимни давлат бошқаруви сифатини яхшилашга қаратилган инвестиция сифатида баҳолайди. Лекин бундай ҳолатларда табиий саволлар туғилади: танлов жараёни қай даражада шаффоф бўлган? Ўқиш учун ажратилган маблағлар қайси манбадан ва қанча миқдорда экани очиқланганми?

    Агар амалдорларнинг бу каби қиммат ўқишлари солиқчилар томонидан қопланаётган экан, жамоатчилик учун энг муҳим масала – шаффофлик ва ҳисобдорлик бўлади. Натижаларни қачон кўрамиз? Кўрамизми ўзи?

  • ФАРЗАНДИНИ ХОРИЖДА ҚАРОВСИЗ ҚОЛДИРГАН ОТА

    ФАРЗАНДИНИ ХОРИЖДА ҚАРОВСИЗ ҚОЛДИРГАН ОТА

    Беш нафар фарзанднинг отаси Ф.Р  Ўзбекистон Республикаси МЖтКнинг 476-моддасида кўрсатилган маъмурий ҳуқуқбузарликни содир этганликда айбдор деб топилиб, унга баъзавий ҳисоблаш миқдорининг ўн баравари, яъни 4.120.000 (тўрт миллион бир юз йигирма минг) сўм жарима жазоси тайинланди.

    Ҳамда ўттиз кун ичида  вояга етмаган фарзанди Д.Э. ни Туркиядан Ўзбекистон Республикасига қайтариш мажбурияти юклатилган бўлишига қарамасдан,  ҳалигача фарзанд ота-она назоратисиз хорижда экани маълум бўлди.

    “Бечора ота” оилавий шароити оғирлиги сабабли вояга етмаган ўғлини ишлаб пул топиш мақсадида Туркияга юборган. Ва боласи жўнатаётган пулга кун кўриб келаётганди. ИИБ ходимлари шуни ҳам кўп кўрди.

    Ота  бўлмиш Ўзбекистон Республикаси ЖКнинг 1221-моддаси 1-қисмида назарда тутилган жиноятни содир қилганликда айбли деб топилди. Унинг озодлиги  2 (икки) йилга чекланди. Ота уйда, фарзанд Туркиядан қачондир қайтади.

    .